"ماناس" حالىقارالىق اۋەجايى. بىشكەك، قىرعىزستان. فوتو: اشىق دەرەككوزدەردەن.

بىشكەك ارقىلى وزگە شەت مەملەكەتكە بارماق بولعان 177 تاجىكستاندىق ازامات قىرعىزستان تارابىنان كەرى قايتارىلدى. بۇنداي مالىمەتتى "ماناس" حالىقارالىق اۋەجايىنىڭ ءباسپاسوز قىزمەتى دە راستاعان. 

كەشە، كەيبىر قىرعىزستاندىق اقپارات قۇرالدارىندا "سومون ەير" اۋە كومپانياسىمەن بىشكەك ارقىلى ۇشپاق بولعان 300 شەتەل ازاماتى "ماناس" اۋەجايىندا قالىپ قويدى دەگەن اقپارات تارعان. الايدا، بۇل مالىمەتتى قىرعىزستان ۇكىمەتى جوققا شىعاردى. اتالعان اۋە كومپانياسىنىڭ بورتىندا 9 شەت مەملەكەتتەن 186 ازاماتتىڭ بولعانىن، 177 تاجىك ازاماتى كەرى قايتارىلعانىن مالىمدەدى. بىشكەك تارابىنىڭ مالىمدەمەسىندە ايتىلۋىنشا، قىرعىز-تاجىك شەكارا جانجالىنا بايلانىستى قىرعىزستاننىڭ شەكارا كۇزەت قىزمەتى تاجىكستاندىق جولاۋشىلاردى ەلگە كىرگىزبەگەن.

قىرعىزستان تاجىكستانمەن شەكاراسىن ءبىر تاراپتى جاۋىپ تاستاعىن 21 مامىر كۇنى بەلگىلى بولعان. ەلدىڭ مينيسترلەر كابينەتى توراعاسى جاعىنان جاسالعان مالىمدەمەدە، شەكارا ۋاقىتشا جابىلعانىن، تاراپتار اراسىنداعى كەلىسىم تولىق تالقىلانبايىنشا شەكتەۋ كۇشىندە قالا بەرەتىنىن ايتقان.

ءساۋىر ايىنىڭ سوڭىندا قىرعىزستان مەن تاجىكتسان ورتاسىندا شەكارا جانجالى بولىپ، جۇزدەگەن ادام جارالانىپ، ونداعان ادام قازا تاپقان. تاراپتار جانجالدى توقتاتقانىمەن ەكى ەل اراسىنداعى كەلىسپەۋشىلىك ءالى دە ءوز كۇيىندە قالىپ وتىر.

“The Qazaq Times”