ەۋروپالىق وداق تۇركياعا سانكتسيا ەنگىزدى

كيپردىڭ ەكونوميكالىق ايماعىندا بۇرعىلاۋ جۇمىستارىن جۇرگىزگەن تۇركياعا ەۋروپالىق وداق سانكتسيا ەنگىزدى. بۇل تۋرالى Reuters اگەنتتىگى حابارلادى.

كەشە 28 ەل مۇشەلىك ەتەتىن ۇيىمنىڭ سىرتقى ىستەر مينيسترلەرى باس قوسىپ وسىنداي شەشىمگە كەلگەن. انكارا وداققا مۇشە بولۋعا كانديدات رەتىندە 145,8 ملن ەۋرو قاراجات الۋى ءتيىس ەدى. بىراق، سانكتسيا سالدارىنان بۇل كومەكتەن قاعىلىپ وتىر. ودان بولەك، ەل اۋماعىندا جوعارى دارەجەلى كەزدەسۋ ۇيىمداستىرۋعا شەكتەۋ قويىلدى. سونداي-اق تۇركيا-ەۋرووداق اۋە كەلىسىمى ءوز كۇشىن جويسا، وڭىردەگى ەۋروپالىق ينۆەستيتسيالىق بانكتىڭ جۇمىسى ۋاقىتشا توقتاتىلدى. ەو سىرتقى ىستەر جانە قاۋىپسىزدىك ساياساتى جونىندەگى جوعارعى كوميسسارى فەدەريكا موگەريني: «جەرورتا تەڭىزىندە تۇركيا ەلى زاڭسىز بۇرعىلاۋ جۇمىستارىن جۇرگىزىپ كەلەدى. وداققا مۇشە مەملەكەتتەر بۇل ارەكەتتىڭ حالىقارالىق قۇقىققا قايشى ەكەندىگىن ايتىپ بىرنەشە مارتە ەسكەرتۋ جاسادى. قۇلاق اسپاعان سوڭ، وسىنداي شەكتەۋ قويۋ قۇجاتىن بەكىتتى. الداعى ۋاقىتتا تۇركيا تاراپى بۇرعىلاۋ جۇمىسىن توقتاتپاسا، شەكتەۋ شارالارى كۇشەيتىلەتىن بولادى»، – دەپ مالىمدەدى.

گفر ەۋروپا ىستەرى بويىنشا مەملەكەتتىك ءمينيسترى ميحاەل روت انكارانىڭ «حالىقارالىق قۇقىقتى تاپتاپ وتىرعانىن» ايتىپ، وداقتىڭ ءبىراۋىزدان كيپردى قولدايتىنىن اشىق جەتكىزدى. ەگەر تۇركيا بۇرعىلاۋ جۇمىستارىن توقتاتپاسا، جاعداي ۋشىعا تۇسپەك. دەگەنمەن، رەسمي انكارا ەۋرووداقتىڭ شەكتەۋىنە مويىنسۇنبايتىنىن جەتكىزدى. تۇركيا سىرتقى ىستەر ءمينيسترى مەۆليۋت چاۆۋشوگلۋ: «ءبىزدىڭ تاراپتىڭ ۇستانىمى بەلگىلى. وڭىردەن تابىلعان تابيعي بايلىق تەڭگدەي بولىنەدى. نەمەسە تۇركيا تاراپى ۇلتى تۇرىك كيپرلىكتەردىڭ قۇقىعىن قورعاۋ ماقساتىندا بۇرعىلاۋ جۇمىستارىن جالعاستىرا بەرمەك. ال ەۋرووداقتىڭ كەز كەلگەن قادامى جاۋاپسىز قالمايتىنىن ايتا كەتەيىك»، – دەپ جاۋاپ قاتتى. انكارا تارابىنىڭ ايتۋىنشا، وڭىردەن تابىلعان گاز كەن ورنىنان تابيعي بايلىقتى وندىرۋگە تۇركيانىڭ زاڭدى قۇقىعى بار. سول سەبەپتى «فاتيح» جانە «ياۆۋز» قۇرىلعىلارى ءوز جۇمىستارىن جالعاستىرا بەرمەك.

نەگىزىنەن داۋدىڭ باسى ەرتەدەن باستالعان. كيپر ەكى مەملەكەتكە ءبولىنىپ، ءبىر بولىگى ەۋرووداق مۇشەسى – كيپر رەسپۋبليكاسى، ال ەكىنشىسى سولتۇستىك كيپردىڭ تۇرىك رەسپۋبليكاسى دەپ اتالادى. بۇل ەلدىڭ ەگەمەندىگىن رەسمي انكارانىڭ ءوزى عانا مويىنداعان. دەمەك، شەكارانى ايقىنداپ العان تۇركيا ول جەردەن ءوز ۇلەسىن الماي قويماسى انىق. جاقىندا س-400 قوندىرعىلارىن ورناتقاندا ەشبىر سەرىكتەسىنە قۇلاق اسپاعان تۇركيا ەۋروپالىق وداقتىڭ شەكتەۋىنەن سەسكەنىپ وتىرماعان دا سىڭايلى.

"The Qazaq Times"