كورنەكى سۋرەت. فوتو: https://liter.kz

قىزىلوردا وبلىسىنا جۇمىس ساپارىمەن بارعان باۋىرجان بايبەك «اقىندارىمىز قوعامداعى وزەكتى ماسەلەلەردى اشىق ايتۋى ءتيىس» – دەدى.

«Nur Otan» پارتياسى توراعاسىنىڭ ءبىرىنشى ورىنباسارى ساپار بارىسىندا پارتيانىڭ وبلىستىق اكتيۆىمەن كەزدەسىپ، الداعى جوسپارلاردى تالقىلاعان. ەلدەگى ايتىستىڭ قايتا جاندانۋىنا قاتىستى پىكىر بىلدىرگەن باۋىرجان بايبەك: «پارتيانىڭ قولداۋىمەن ەندى اي سايىن ءار وڭىردە ايتىس ۇيىمداستىرىلادى. ونىڭ العاشقىسى كۇزدە الماتىدا وتەدى. اقىندارىمىز قوعامداعى وزەكتى ماسەلەلەردى اشىق ايتۋى ءتيىس. بىراق بارلىعى كونسترۋكتيۆتى بولۋى قاجەت»، – دەدى.

ايتىس ونەرى قازاقستاندا 1950 جىلدارى جاڭاشا جاڭعىرىپ، سوۆەت كەزەڭىندە نەگىزىنەن قازاق ءتىلدى اۋديتوريا ورتاسىندا ەرەكشە تانىمال بولعان. 1991 جىلدان بەرى ايتىسكەر اقىندار كورەرمەننىڭ قولداۋىن تابۋ ءۇشىن وتكىر الەۋمەتتىك-ساياسي ماسەلەلەردى ءجيى كوتەردى. 2000 جىلداردىڭ ورتاسىنان باستاپ قازاقستان بيلىگى ايتىستى «بەيساياسيلاندىرۋعا» كۇش سالعان. ايتىس تەلەديداردان كوپ كورسەتىلمەي، بىرقاتار اقىندار رەسپۋبليكالىق ايتىستاردان شەتتەتىلگەن.

"The Qazaq Times"