ارىستا تاعى ءورت!

11 شىلدەدە تءۇركىستان وبلىسى ارىس قالاسىندا دەپو اۋماعىنداعى قويمادا ءورت بولدى. بۇل تۋرالى تءوتەنشە جاعداي كوميتەتى مەن وبلىستىق ءاكىمدىك حابارلادى دەپ جازدى ورتالىق ازيا جاڭالىقتار قىزمەتى.

توتەنشە جاعداي كوميتەتىنىڭ حابارلاۋىنشا، ء"ورت سوندىرىلگەن. جالىندى سوندىرۋگە وننان استام تەحنيكا مەن 55 ءورت ءسوندىرۋشى، ورتكە قارسى پويىز بەن ارىس ستانساسىنىڭ قىزمەتكەرلەرى جۇمىلعان. ءورت 2040 شارشى مەتر اۋماقتى شارپىعان".

كوميتەت وكىلى نۇرسۇلتان نۇراحمەتوۆ قۇرىلىس جۇمىستارى كەزىندە ءورت قاۋىپسىزدىگى ساقتالماعانىن، سسىنىڭ سالدارىنان ءورت شىققانىن ايتتى.

تۇركىستان وبلىستىق اكىمدىگىنىڭ دەرەگىنشە، ورتتەن زارداپ شەككەندەر جوق.

24 ماۋسىمدا تۇركىستان وبلىسى ارىس قالاسىنداعى اسكەري قويمادا ءورت شىعىپ، سالدارىنان وق-ءدارى جارىلعان. دەنساۋلىق ساقتاۋ مينيسترلىگىنىڭ دەرەگىنشە، جارىلىستان ءۇش ادام (ارىس تۇرعىنى مەن ەكى اسكەري) قازا تاۋىپ، 400-دەن استام ادام دارىگەر كومەگىنە جۇگىنگەن ەدى. 40 مىڭنان استام ادام قالانى تاستاپ كەتكەن. تۇرعىندار قالاعا 28 ماۋسىمدا ورالعان.

قالانىڭ قاۋىپسىز ەكەندىگىنە وبلىس اكىمى ومىرزاق شۇكەەۆتەن باستاپ ءبىراز شەندىلەر ۋاعدا بەرگەندى. ال ەلىمىزدىڭ قورعانىس ءمينيستىرى نۇرلان ەرمەكباەۆ بۇل تراگەديانى "تابيعي اپات" دەپ اتاپ ءبىراز سىنعا ۇشىراعان بولاتىن.

“The Qazaq Times”