قىتاي سولتۇستىك كورەيانى ايىپتاپ شىعا كەلدى

اقش-كورەيا بىرلەسكەن ارمياسىنىڭ ارەكەتتەرىنە، وڭتۇستىك كورەيانىڭ «ساد» جۇيەسىن ورناتۋ ىسىنە ورتاق قارسى تۇرۋدى قولداعان قىتاي، سولتۇستىك كورەيانىڭ بالليستيكالىق زىمىران اتۋ ىسىنە قارسى ەكەنىن ءبىلدىردى. بۇل تۋرالى كەشە كەشتە، 6 ناۋرىز، قىتاي سىرتقى ىستەر مينيسترلىگىنىڭ مالىمدەمەشىسى گىڭ شۋاڭ ءمالىم ەتتى. رەسمي بەيجىڭ سولتۇستىك كورەيانىڭ بۇل ارەكەتىن قاۋىپسىزدىك كەڭەسىنىڭ ارناۋلى قارارلارىن بۇزۋ دەپ ايىپتاعان. بۇل تۋرالى Xinhua اگەنتتىگىنىڭ رەسمي سايتى حابارلاپ وتىر.

كەشە كەشتە قىتاي سىرتقى ىستەر مينيسترلىگىنىڭ ءباسپاسوز ماجىلىسىندە بەلگىلى بولعان بۇل مالىمدەمە، قىتاي ۇكىمەتىنىڭ قحدر بالليستيكالىق زىمىرانداردى اتۋىنا قاراتقان ۇستانىمى بولىپ سانالادى. وسىدان بۇرىن اقش پەن وڭتۇستىك كورەيانىڭ بىرلەسكەن اسكەري ارەكەتتەرىنە ورتاق قارسى تۇرۋدى قولداعان قىتاي تارابى، قحدر-نىڭ ورەسكەل ارەكەتىن ايىپتاپ وتىر. كورەي تۇبەگىندەگى جاعدايدىڭ ۋشىعۋىن كەلتىرىپ شىعاراتىن ورەسكەل قاتەلىك دەدى قىتاي سىرتقى ىستەر مينيسترلىگىنىڭ مالىمدەمەشىسى.

قىتاي مالىمدەمەشىسى ءسوزىنىڭ كەلەسى سالماعىن اقش-كورەيا بىرلەسكەن ارمياسىنىڭ اسكەري وقۋ-جاتتىعۋىنا تاستادى. سولتۇستىك كورەياعا قارسى بىرلەسكەن اسكەري وقۋ-جاتتىعۋدىڭ اعىمداعى جاعدايعا وتە تيىمسىزدىگىن اتاپ ءوتتى. تۇبەكتىڭ قاۋىپسىزدىگى مەن حالىقتىڭ اماندىعىن ويلاپ، بارلىق مۇددەلى تاراپتاردىڭ سابىرلىلىق تانىتۋىن، ءبىر-ءبىرىن قاقتىعىسقا يتەرمەۋىن تالاپ ەتتى.

كورەي تۇبەگى جاعدايى قازىر شاحمات ۇستەلىنە ۇقساپ تۇر. ءار تاراپ وزدەرىنىڭ اياعىن اڭدىپ باسىپ، جانجال تۋىلىپ، قاقتىعىس ورىن الىپ جاتسا باستى جاۋاپكەرشىلىكتى ارقالايتىن تاراپتى ايقىنداۋ ءۇشىن اقش، رەسەي، قىتاي، جاپونيالار ەكى كورەي ەلىنىڭ ءبىرىن ىستىككە جانشۋعا ءازىر دەۋگە بولادى. رەسمي بەيجىڭنىڭ كحدر بالليستيكالىق زىمىران اتۋ ىسىنە قارسى پىكىردە بولۋى، اقش پەن وڭتۇستىك كورەيا الدىنداعى ۇپايىن تۇگەندەۋ ءۇشىن بولسا كەرەك.

“The Qazaq Times”