فوتو: https://sputniknews.kz

قر ءبىلىم جانە عىلىم ۆيتسە-ءمينيسترى ەلميرا سۋحانبەرديەۆاعا سوت ۇكىم كەستى.

وسىعان دەيىن ۇلكەن كولەمدە پارا الدى دەپ قاماۋعا الىنىپ، ىزىنشە قىزمەتتىك بابىن اسىرا پايدالاندى دەپ ايىپتالعان ە.سۋحانبەرديەۆاعا قاتىستى سوت پروتسەسى وسى اياقتالدى. سوت ونى كىنالى دەپ تانىپ، 2500 اەك كولەمىندە ايىپپۇل سالدى، سونىمەن قاتار ءومىر باقي مەملەكەتتىك قىزمەتتە جۇمىس ىستەۋ قۇقىعىنان ايىردى.  سونىمەن قاتار نۇر-سۇلتانداعى №3 مەكتەپ-گيمنازيانىڭ بۇرىنعى ديرەكتورى ەلەنا شەۆەرنياەۆاعا دا ۇكىم شىقتى.

6 ماۋسىمدا استانا سوتى ايىپتالۋشىنى تامىزدىڭ 2-ىنە دەيىن قاماۋعا الۋعا بايلانىستى شەشىم شىعاردى. بۇعان دەيىن ۇلتتىق بيۋرو ۆيتسە-ءمينيستردىڭ ۇستىنەن جەمقورلىققا قاتىستى قىلمىستىق ءىس قوزعالعاندىعىن مالىمدەگەن.

ايتا كەتەيىك، ەلميرا سۋحانبەرديەۆا 1971 جىلى 26 قازاندا اتىراۋ وبلىسىندا دۇنيەگە كەلگەن. 1995 جىلى ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. 2013-2016 جىلدار ارالىعىندا استانا قالالىق ءبىلىم باسقارماسىنىڭ باسشىسى بولىپ قىزمەت اتقارعان. 2016 جىلى ساۋىردەن بەرى ءبىلىم جانە عىلىم ۆيتسە-ءمينيسترى بولعان.

"The Qazaq Times"