اقش يرانعا سانكتسيا ەنگىزدى

رەسمي ۋاشينگتون يرانعا قارسى سانكتسيا ەنگىزدى. اقش-تىڭ ۇلتتىق قاۋىپسىزدىك جونىندەگى كەڭەسشىسى دجون بولتون ۆاشينگتوندا وتكەن كونفەرەنتسيادا وسىنداي مالىمدەمە جاسادى.

بولتوننىڭ ايتۋىنشا، دونالد ترامپ يرانمەن يادرولىق باعدارلاما بويىنشا جاڭا كەلىسىم جاساۋدى ماقسات ەتىپ وتىر. بىراق، يران تارابى اتالعان كەلىسىمدى بۇزعاندىقتان، قۇراما شتاتتارى جاڭا سانكتسيالاردى جۇزەگە اسىرىپ وتىر.

وسىعان دەيىن تاراپتار اراسىندا وتكەن كەلىسسوزدەر ەش ناتيجە بەرگەن جوق. ال جۋىردا يران ۋران بايىتۋ دەڭگەيىن 3,67 ۇلعايتتى. وسىلايشا، تەھران يادرولىق كەلىسىمگە بايلانىستى ءوز مىندەتتەمەلەرىن ورىنداۋدى ۋاقىتشا توقتاتىپ وتىر. 24 ماۋسىمدا اقش پرەزيدەنتى جەكسەنبى كۇنى جاساعان مالىمدەمەسىندە، يرانعا باعىتتالعان ەكونوميكالىق سانكتسيالاردىڭ قاشان جويىلاتىنىن دا اتاپ ءوتتى. ول سوزىندە: «يران ەشقاشان يادرولىق قارۋعا يە بولا المايدى. تەھران قاشان سىنداردى دامۋ جولىنا تۇسكەندە، ەكونوميكالىق سانكتسيالار جويىلاتىن بولادى. يران يادرولىق قارۋدان باس تارتقان كەزدە مەن ولاردىڭ دوسى بولامىن»، – دەپ مالىمدەمە جاسادى.

ايدىڭ باسىندا اتوم ەنەرگياسى جونىندەگى حالىقارالىق اگەنتتىك (ماگاتە) ساراپشىلارى يراننىڭ 2015 جىلدان بەرى العاش رەت بەلگىلەنگەن مەجەدەن ارتىق ۋران قورىن بايىتا باستاعانىن مالىمدەگەن. يراننىڭ از بايىتىلعان ۋران قورلارىن يادرولىق كەلىسىمدەگى شەكتەۋدەن اسىرعانى بەلگىلى بولعان سوڭ، ەۋروپالىق وداق ەلدەرى تەھرانعا ەسكەرتۋ جاسادى. دەگەنمەن، يران پرەزيدەنتى حاسان روۋحاني حالىقارالىق شەكتەۋگە قاراماستان وزىنە قاجەت مولشەردەگى ۋران قورىن بايىتا بەرەتىنىن مالىمدەدى. يران جەتەكشىسى بۇعان قوسا يادرولىق جوبالارىنىڭ ءبىر بولىگىن توقتاتۋ جايلى اقش-پەن جاساعان كەلىسىمدى ۋاشينگتون مويىنداۋى ءتيىس دەدى. ەگەر بۇل جونىندە تەھران ۋاشينگتونمەن كەلىسىمگە كەلە السا، «قالاعان مولشەردە ۋران بايىتۋ» ويىنان قايتاتىنىن، سوندىقتان حالىقارالىق قاۋىمداستىق بۇعان الاڭداماۋى قاجەت دەپ حابارلادى.

"The Qazaq Times"