شىلدەنىڭ 6-سى، استانا كۇنى مەرەكەسىندە الماتى قالاسىندا ساعات شامامەن 19:15-19:50 ارالىعىندا الماتى قالاسىنىڭ ورتالىق ستاديون مەن بالۋان شولاق اتىنداعى سپورت كەشەنى (اباي داڭعىلى مەن بايتۇرسىنوۆ كوشەسىنىڭ قيىلىسى)  ماڭايىنا جينالعان جۇرتشىلىقتى جانە جۇرگىنشىلەردى ۇستاۋ جيىلەپ، ارنايى جاساق تا كۇشەيتىلگەن تارتىپتە جۇمىس جۇرگىزگەنى بايقالدى.

«ميليتسيالار مۇندا نە ىستەپ ءجۇر؟»، «ارىسقا بارماي ما؟»، «الاياقتاردىڭ ىزىنە تۇسپەي مە؟» دەپ ءبىر توپ ايەلدەر ءوز پىكىرىن بىلدىرسە، كەيبىر ازاماتتار «العا، قازاقستان!»، «ويان، قازاق!»، «بوستاندىق» دەپ ۇرانداپ جاتتى.  قايسىبىر ازاماتتار «زاڭسىز» ميتينگىگە ارنايى كەلگەنىن اشىق جاريالاپ، ال كەيبىرى جاي عانا مەرەكەلىك سەرۋەندە سەيىلدەپ جۇرگەنىن ايتتى. ءتىپتى ۇستاۋ جيىلەگەن تۇستا اۆتوزاكتار الدىندا بىرنەشە ۇستالۋشى قولدارى قايىرىلعان كۇيدە كەزەكتە كىدىرىپ تۇرىپ قالدى. 19:28-دە ءوزىن كۇمىسبەك بەسجان دەپ تانىستىرعان مەملەكەتتىك تۋ اسىنىپ، باسىنا ۇلتتىق ورنەكتى تاقيا كيگەن جاس جىگىت تە ۇستالدى. ۇستالعانداردىڭ قاتارىندا كورنەكتى كوسەمسوزشى، اقىن مىرزان كەنجەباي دا بولدى. ءبىرشاما ۇستاۋلاردان سوڭ ەگدە جاستاعى بىرنەشە زەينەتكەر، ايەل ازاماتتار پوليتسيانىڭ ارەكەتىنە نارازىلىقتارىن ءبىلدىرىپ، تۇتقىنداۋدى تىيۋدى تالاپ ەتتى.

اراگىدىك، اسىرەسە ساعات 19:30-دارعا تاياۋ كوشە بويىندا اۆتوكولوننالىق سيگنالدار داۋىسى زورايا ءتۇستى. بىرنەشە كولىك يەسى سيگنال بەرگەنى ءۇشىن جول بويىندا توقتالىپ، اۆتوزاكقا مىنگىزىلىپ، جەڭىل كولىكتەردى ارنايى جول-پاترۋلدىك ەۆاكۋاتورمەن الىپ كەتتى. وقيعا ورنىنا تۇرعىندار مەن جۇرگىنشىلەردى  تاراۋعا پوليتسيا قىزمەتكەرلەرىمەن بىرگە المالى جانە بوستاندىق اۋداندارىنىڭ اكىمدەرى بەكقالي تورعاەۆ پەن التاي راقىمبەكوۆ تە كەلدى. ولار اتالمىش جيىننىڭ زاڭسىز ەكەنىن ەسكەرتىپ، وعان قاتىسۋشىلارعا شارا قولدانىلاتىنىن ايتتى.

كەشكى 21:30-دار شاماسىندا قر ىشكى ىستەر مينيسترلىگى فەيسبۋك پاراقشاسىندا ارنايى مالىمدەمە جاريالادى. وندا پوليتسيا بولىمدەرىنە جەتكىزىلگەن زاڭسىز ميتينگ ۇيىمداستىرۋشىلارى مەن بەلسەندى قاتىسۋشىلارىنىڭ كەيبىرەۋىنەن «تۇتىندەگىش قۇتى جانە تراۆماتيكالىق قارۋ» الىنعانىن ايتىلعان. سونداي-اق  قۇقىق قورعاۋ وكىلدەرى تاراپىنان «ءتارتىپ بۇزۋشىلاردى ۇستاۋ بارىنشا ساۋاتتى جۇرگىزىلدى، ارنايى قۇرالدار قولدانىلعان جوق» دەپ قورىتىندىلانعان.

وسىعان دەيىن قر اۋماعىندا ەكسترەميستىك ۇيىم رەتىندە تانىلىپ، جۇمىسىنا تىيىم سالىنعان «قازاقستاننىڭ دەموكراتيالىق تاڭداۋى» («قدت») قوزعالىسىنىڭ باسشىسى مۇحتار ءابليازوۆ كوپشىلىك ازاماتتاردى ينتەرنەت ارقىلى 6 شىلدە جاپپاي نارازىلىق شاراسىنا شاقىرعان ەدى. جالپى الماتىدا وتكەن سانكتسيالانباعان جيىندا 100-دەن اسا ازامات ۇستالدى.

“The Qazaq Times”