يتاليالىق سوتسيال-دەموكرات داۆيد ساسسولي ەۋروپالىق پارلامەنتتىڭ جاڭا باسشىسى بولىپ سايلاندى.

سايلاۋدىڭ ەكىنشى كەزەڭىندە ساسسوليگە 345 دەپۋتات داۋىس بەرگەن. بۇرىن جۋرناليست بولعان داۆيد ساسسولي 2009 جىلدان بەرى ەۋرودەپۋتات لاۋازىمىن اتقارىپ كەلەدى. ءبىراز ۋاقىت كولەمىندە ۆيتسە-سپيكەر بولعان ول كولىك پەن تۋريزم سالالارىن دامىتۋ ماسەلەلەرىمەن اينالىسقان.

سايلاۋ قورىتىندىسى بويىنشا ەكىنشى ورىندى چەحيالىق كونسەرۆاتور يان زاحراديل، ال ءۇشىنشى ورىندى گەرمانيالىق جاسىلدار پارتياسىنىڭ وكىلى سكا كەللەر يەلەنگەن. ال ەڭ از داۋىستى سولشىل كوزقاراستاعى يسپانيالىق دەپۋتات سيرا رەگو جيناعان.
4 شىلدەدە بريۋسسەلدە ەۋرووداقتىڭ جاۋاپتى لاۋازىمدارىنا ۇمىتكەرلەردى سايلاۋعا قاتىستى ۇشكۇندىك مارافون مارەسىنە جەتكەن بولاتىن. ناتيجەسىندە، ەۋروكەڭەس توراعالىعىنا بەلگيا پرەمەرى شارل ميشەل سايلاندى. وداققا مۇشە 28 مەملەكەت باسشىلارىنىڭ شەشىمى بويىنشا ەۋروكوميسسيا پرەزيدەنتى قىزمەتىنە گەرمانيانىڭ قورعانىس ءمينيسترى ۋرسۋلۋ فون دەر ليايەن ۇسىنىلدى. ەۋروپانىڭ ورتالىق بانكىنە حالىقارالىق ۆاليۋتا قورىنىڭ وكىمشى-ديرەكتورى كريستين لاگارد، ال ەو ديپلوماتياسى باسشىسىلىعىنا يسپانيا سىرتقى ىستەر ءمينيسترى جانە

ەۋروپارلامەنتتىڭ بۇرىنعى توراعاسى جوزەپ بوررەل كانديداتۋراسى لايىقتى دەپ تانىلدى. ەگەر گەرمانيادان ۇسىنىلعان ۇمىكتەر ۋرسۋلۋ فون دەر ليايەن جەڭىسكە جەتسە، تاريحتا تۇڭعىش رەت ەۋروپالىق كوميسسيانى ايەل ادام باسقارماق. اتالعان كانديداتۋرالار ەۋروپارلامەنتتە ماقۇلدانسا، وداقتىڭ نەگىزگى ءتورت قىزمەتىنىڭ باسشىسى 1 قاراشادان باستاپ ءوز قىزمەتىن باستايدى.

 

"The Qazaq Times"