فوتو: ۆۆس

بىرىككەن اراب امىرلىكتەرىنەن قاشقان حانشايىم حايا بينت ءال-حۋسەين ادۆوكات كومەگىنە جۇگىنىپ، بريتانيا جوعارى سوتىنا شاعىم ءتۇسىردى.

«بۇل دۋباي بيلەۋشىسىنىڭ ايەلى اجىراسۋ تۋرالى شەشىم قابىلداعانىن جانە سوت پروتسەسس قورىتىندىسى بويىنشا رەكوردتىق وتەماقى تالاپ ەتەتىندىگىن بىلدىرەدى. ال الەمدىك ساياساتتا بۇل جاعدايدىڭ ءباا مەن ۇلىبريتانيا بايلانىسىنا نۇقسان كەلتىرۋ قاۋپى بار»، –  دەيدى «Times» باسىلىمى.

3 شىلدەدە حايا حانشايىمنىڭ دۋبايدان قاشىپ كەتكەنى تۋرالى اقپاراتتار تاراعان بولاتىن. كەيىننەن ونىڭ لوندوندا جاسىرىن تۇرعانى بەلگىلى بولدى. بريتاندىق تابلويدتار بۇعان دەيىن حانشايىمنىڭ ءباا-دەن 11 جاسار قىزىمەن جانە 7 جاسار ۇلىمەن گەرمانياعا قاشىپ كەتكەنىن حابارلاعان. بىراق، گەرمانيا بيلىگى بۇل حاباردى راستامادى. «The Sun» گازەتىنىڭ اقپاراتى بويىنشا، حانشايىم وزىمەن بىرگە 39 ملن دوللارعا جۋىق اقشا العان. شەتەلدىك باسىلىمدار حانشايىمنىڭ ءبىراز ۋاقىتي بويى شەيحتان ءجابىر كورگەنىن، زورلىق-زومبىلىقپەن ءومىر سۇرگەنىن جازدى. ازىرشە، ءباا بيلگى بۇل اقپاراتقا قاتىستى مالىمدەمە ەجاساعان جوق. ەگەر دۋباي حايا حانشايىمدى ەلگە قايتارۋدى تالاپ ەتكەن جاعدايدا، ۇلىبريتانيا مەن ءباا ديپلوماتيالىق قارىم-قاتىناسىنا نۇقسان كەلۋى مۇمكىن.

حايا بينت ءال-حۋسەين يوردانيادا دۇنيەگە كەلىپ، بريتانياداعى بادمينتون مەكتەپ-ينتەرناتىندا جانە برايەنستون مەكتەبىندە وقىعان. وكسفورد ۋنيۆەرسيتەتىنىڭ ستۋدەنتى بولعان. 2004 جىلى ول ءباا ۆيتسە-پرەزيدەنتى مەن پرەمەر-ءمينيسترى، ياعني دۋباي بيلەۋشىسى شەيح موحاممەد يبن راشيد ءال-ماكتۋمنىڭ التىنشى ايەلى بولدى. 2007 جىلى قىزى، ال 2012 جىلى ۇلدارى دۇنيەگە كەلگەن. دەرەكتەر بويىنشا، شەيح موحاممەد يبن راشيد ءال-ماكتۋمنىڭ نەكەدەگى ايەلدەرىنەن 23 بالاسى بار.

"The Qazaq Times"