وڭتۇستىك كورەياعا قاشىپ وتەتىن سولتۇستىك كورەيالىقتاردىڭ سانى كوبەيگەن

بيىل جىل باسىنان بەرى وڭتۇستىك كورەياعا باس ساۋعالاپ بارعان سولتۇستىك كورەيالىقتاردىڭ سانى 550-گە جۋىقتاعان. بۇل تۋرالى سول ەلدەگى بىرىكتىرۋ مينيسترلىگى رەسمي مالىمدەمە جاسادى.

اتالعان مينيسترلىكتىڭ مالىمدەۋىنشە، قازىر ەلدە سولتۇستىك كورەيانىڭ شەكاراسىنان قاشىپ ءوتىپ، پانا سۇراي كەلگەن 32 مىڭ ادام بار. 2011 جىلى كيم جوڭ ۋن بيلىككە كەلگەننەن بەرى سولتۇستىك كورەيا شەكاراسىنان قاشىپ شىعاتىنداردىڭ سانى كوبەيە تۇسكەن. جىلىنا شامامەن 1000-1500 ادام وڭتۇستىك كورەياعا جان ساۋعالاپ بارادى. بيىل جىلدىڭ العاشقى 6 ايىندا  546 سولتۇستىك كورەيالىق وڭتۇستىك كورەياعا قاشىپ وتكەن.

قازىر وڭتۇستىك كورەيا بىرىكتىرۋ مينيسترلىگى جوعارى بيلىكتەن سولتۇستىك كورەيالىق بوسقىندارعا قولداۋ كورسەتۋگە بولىنەتىن قاراجاتتى كوبەيتۋ تۋرالى ۇسىنىس بەرۋدە.

سولتۇستىك كورەياداعى قاتاڭ رەجيمنەن قۇتىلۋعا تاۋەكەل ەتەتىندەر ءتۇرلى جولدارمەن ەلدەن شىعۋعا تىرىسادى. الايدا، سولتۇستىك كورەيادا ەلدەن قاشۋعا ارەكەت ەتكەندەر ءولىم جازاسىنا كەسىلەدى نەمەسە قالعان ءومىرىن ەڭبەك لاگەرىندە وتكىزەدى. ەلدىڭ سولتۇستىك وڭىرىندەگى بۇنداي تاۋەكەلشىلدەر قىتاي شەكاراسىنا جاسىرىن ءوتىپ، قىتاي دەلدالدارى ارقىلى وڭتۇستىك كورەياعا بارۋعا ارەكەت قىلادى. بۇل ارالىقتا قىتايلىق دەلدالداردىڭ ادام ساۋداسىمەن اينالىسقانى تۋرالى دا دەرەكتەر بار. سولتۇستىك كورەيانىڭ قاتاڭ رەجيمىنەن قۇتىلۋ ءۇشىن جاپون تەڭىزىنەن قايىقپەن وتۋگە تاۋەكەل ەتكەندەر دە كەزدەسەدى.

“The Qazaq Times”