ەۋرووداق يرانعا ەسكەرتۋ جاسادى

ەۋرووداق ديپلوماتياسى، گەرمانيا، ۇلىبريتانيا جانە فرانتسيا تارابى تەھرانعا يادرولىق كەلىسىمدەگى ەرەجەلەردى ساقتاۋ تۋرالى ەسكەرتتى.

ۆۆس مالىمەتىنشە، ەۋرووداق ەلدەرى يراننىڭ از بايىتىلعان ۋران قورلارىنىڭ 300 كيلوگرامدىق شەگىنەن اسىپ كەتپەۋىن قاداعالاماق. سەبەبى، اتالعان مەجە بۇۇ قاۋىپسىزدىك كەڭەسىنىڭ بەس تۇراقتى مۇشە ەلدەرى، گەرمانيا جانە يران اراسىنداعى كەلىسىمدە قاراستىرىلعان. ەۋروپالىق ديپلوماتتار وسى ماسەلەگە قاتىستى: «يران كەلىسىمدى ساقتاعان جاعدايدا ءبىز دە كەلىسىمگە ساي ارەكەت ەتەتىن بولامىز. ءبىزدىڭ تاراپ شارت تالاپتارىن بۇزعان ەمەس، بولاشاقتا دا سولاي بولماق. بىراق، يران دا كەلىسىمدى قاتاڭ ساقتاۋعا مىندەتتى»، – دەدى.

وسى اپتا باسىندا اتوم ەنەرگياسى جونىندەگى حالىقارالىق اگەنتتىك (ماگاتە) ساراپشىلارى يراننىڭ 2015 جىلدان بەرى العاش رەت بەلگىلەنگەن مەجەدەن ارتىق ۋران قورىن بايىتا باستاعانىن مالىمدەگەن. دەگەنمەن، يران پرەزيدەنتى حاسان روۋحاني حالىقارالىق شەكتەۋگە قاراماستان وزىنە قاجەت مولشەردەگى ۋران قورىن بايىتا بەرەتىنىن مالىمدەدى. يران جەتەكشىسى بۇعان قوسا يادرولىق جوبالارىنىڭ ءبىر بولىگىن توقتاتۋ جايلى اقش-پەن جاساعان كەلىسىمدى ۋاشينگتون مويىنداۋى ءتيىس دەدى. ەگەر بۇل جونىندە تەھران ۋاشينگتونمەن كەلىسىمگە كەلە السا، «قالاعان مولشەردە ۋران بايىتۋ» ويىنان قايتاتىنىن، سوندىقتان حالىقارالىق قاۋىمداستىق بۇعان الاڭداماۋى قاجەت دەپ حابارلادى.

"The Qazaq Times"