پرەزيدەنت قاسىم-جومارت توقاەۆ Bloomberg Media Group كومپانياسىنىڭ باس اتقارۋشى ديرەكتورى دجاستين سميتپەن كەزدەستى. بۇل تۋرالى اق وردا سايتى حابارلادى.

كەزدەسۋ بارىسىندا تاراپتار قازاقستاننىڭ ينۆەستيتسيالىق احۋالىن ودان ءارى جاقسارتۋ پەرسپەكتيۆالارى جونىندە پىكىر الماستى. پرەزيدەنت Bloomberg كومپانياسىنىڭ بۇكىل الەم بويىنشا ساياسي، اسكەري، قارجىلىق سالا تۋراسىندا اقپارات تاراتاتىنىن اتاپ ءوتىپ، قازاقستاننىڭ ينۆەستيتسيالىق مۇمكىندىكتەرىن ىلگەرىلەتۋدەگى الەمدىك مەديانىڭ ىقپالىنا توقتالدى.

سونىمەن قاتار، «استانا» حالىقارالىق قارجى ورتالىعى الاڭىنان تىكەلەي حابار تاراتاتىن Bloomberg ستۋدياسىن اشۋ، بەدەلدى حالىقارالىق بۇقارالىق اقپارات قۇرالدارىن تارتۋ ءۇشىن مەدياحاب قۇرۋ، ءىرى ۇلتتىق كومپانيالار اكتسيالارىنىڭ «استانا» حالىقارالىق قارجى ورتالىعى بيرجاسىنا شىعۋىن ۇيىمداستىرۋ ماسەلەلەرى تالقىلانعان.

"The Qazaq Times"