وساكا ءسامميتىنىڭ قورتىندى وتىرىسى. فوتو: The Japan Times.

وتكەن اپتانىڭ سوڭىندا الەم ەلدەرىنىڭ نازارى جاپونيانىڭ وساكا قالاسىندا وتكەن «ۇلكەن جيىرمالىق» سامميتىنە اۋدى. الەمدەگى الدىنعى قاتارلى ەكونوميكاعا يە ەلدەردىڭ ليدەرلەرى مەن وزگە دە ەلدەر مەن ۇيىمداردىڭ وكىلدەرى شاقىرىلعان جينالىس شىن مانىسىندە دە وزىندىك ماڭىزعا يە ەدى. ولاي دەيتىنىمىز، اتالمىش جيىن حالىقارالىق ساياسي-ەكونوميكالىق قايشىلىقتاردىڭ كۇشەيگەن تۇسىندا ءوتتى.

سەنبى كۇنى ءسامميتتىڭ قورىتىندى جينالىسىندا جاپونيانىڭ باس ءۋازىرى (پرەمەر-ءمينيسترى) شينزو ابە بايانداما جاساپ، الەم ەلدەرىنىڭ ليدەرلەرىن ىنتىماقتاستىق پەن تۇراقتى دامۋعا شاقىردى. ول سوزىندە الەمدى ساۋدا سوعىسى مەن پروتەكتسيونيزم تولقىنى شارپىپ تۇرعانىن ەرەكشە اتاي كەلىپ، قاتىسۋشىلاردان كەلىسپەۋشىلىكتەردى شەشۋ كەزىندە ورتاق نەگىزگە ۇمتىلۋدى ءوتىندى.

جاپون پرەمەرى سوزىندە: «بىزدە قازىر الەمدىك ەكونوميكا مەن تۇراقسىزدىققا بايلانىستى ءتۇرلى الاڭداۋشىلىق بار. شىن مانىسىندە ءبىزدىڭ جاۋاپكەرشىلىگىمىز بۇدان دا كۇشتىرەك. ءبىز وساكادا قابىلدانعان دەكلاراتسياعا نەگىزدەلە وتىرىپ، ايىرماشىلىقتاردان كورى ورتاقتىققا قاراي ۇمتىلۋعا ءتيىسپىز. الداعى ۋاقىتتا ءوزارا ءتيىمدى، ورنىقتى دامۋعا يە بولاشاق قوعامىن قۇرعانعا دەيىن بىرگە جۇمىس ىستەي بەرەيىك»، – دەدى.

جاپونيانىڭ باس ءۋازىرى سوزىندە اقش پرەزيدەنتى مەن قىتاي باسشىسىنا دا ۇسىنىسىن ايتا كەتتى. ونىڭ ويىنشا، ترامپ پەن شي جينپيڭ ساۋدا قايشىلىعىن شەشۋ ءۇشىن سىندارلى پىكىر تالاس جۇرگىزۋى كەرەك. سونداي-اق، سەنبىدەگى وتىرىستا ساۋد ارابياسىنىڭ تاق مۇراگەر حانزاداسى مۇحاممەد بين سالمان دا جاپون باس ءۋازىرىنىڭ ءسوزىن قوستاپ، حالىقارالىق ىنتىماقتاستىق پەن تۇراقتىلىق ءۇشىن ۇيلەستىرۋ جۇمىستارىنىڭ كەرەك ەكەنىن ايتتى.

وسپاكاداعى جينالىستا بىرقاتار ەلدەردىڭ باسشىلارى جەكەلەگەن كەزدەسۋلەر وتكىزىپ، ەكى جاقتى، كوپ جاقتى ىنتىماقتاستىق تۋرالى تالقى وتكىزگەن بولاتىن. ەگەر الداعى ۋاقىتتا الەم ەكونوميكاسى ءۇشىن جاڭا قاۋىپ قاتارلى سانالعان ساۋدا سوعىسىندا اقش پەن قىتاي كەلىسىمگە جۇگىنسە، سوعىس قاۋپىنەن الەم جۇرتشىلىعىن الاڭداتىپ وتىرعان اقش-يران قايشىلىعى رەتتەلىپ جاتسا، وندا وساكاداعى ءدۇبىرلى جيىننىڭ وڭ ىقپالى دەپ ساناۋعا بولادى.

“The Qazaq Times”