سولتۇستىك كورەيادا كەزەكتى شەتەلدىك ستۋدەنت قاماۋعا الىندى

سولتۇستىك كورەيادا پحەنيان قالاسىنداعى كيم ير سەن ۋنيۆەرسيتەتىنىڭ ستۋدەنتى، 29 جاستاعى اۋستراليا ازاماتى الەك سيگلي قاماۋعا الىندى.

«The Wall Street Journal» باسىلىمىنىڭ حابارلاۋىنشا، ستۋدەنتكە قانداي ايىپ تاعىلعانى بەيمالىم. دەگەنمەن، كەي مالىمەتتەر بويىنشا ول سولتسۇتىك كورەياداعى ءومىرى، كۇندەلىكتى تۇرمىس، وزىنە ۇناعان كورىكتى مەكەندەر جانە باسقا دا تاقىرىپتاردا شەتەلدىك باسىلىمدارعا ماقالا جازىپ كەلگەن. سونىمەن قاتار، سيگلي كحدر-دا وقۋ كۋرسىندا بولعان، تۋريستەرگە ارنايى ەكسكۋرسيالار ۇيىمداستىرعان.قازىرگى ۋاقىتتا اۋستراليانىڭ سىرتقى ىستەر مينيسترلىگى اتالعان جايتقا قاتىستى كحدر بيلىگىنەن تۇسىنىكتەمە تالاپ ەتىپ وتىر.

2016 جىلى سولتۇستىك كورەياداعى قوناق ۇيلەردىڭ بىرىندە كوسەم بەينەلەنگەن ۇگىت پلاكاتىن جىرتقان امەريكالىق ستۋدەنت وتتو ۋورمبير تۇتقىندالعان ەدى. ۆيردجينيا ۋنيۆەرسيتەتىنىڭ 22 جاستاعى ستۋدەنتىنە 15 جىل ءماجبۇرلى ەڭبەككە جەگىلۋ جازاسى كەسىلگەن. ءۋورمبيردىڭ سوتى 2016 جىلى ناۋرىزدا ءوتىپ، ءبىر-اق ساعاتقا سوزىلعان. سولتۇستىك كورەياداعى شۆەتسيا ديپلوماتتارىنا ۋورمبيرمەن كەزدەسۋگە رۇقسات ەتپەگەن. ۋاشينگتوننىڭ سولتۇستىك كورەيامەن تىكەلەي ديپلوماتيالىق بايلانىسى جوق بولعاندىقتان بۇل ەلدە اقش مۇددەسىن شۆەتسيا جۇزەگە اسىرادى. اقش اقپارات قۇرالدارى بۇعان دەيىن ستۋدەنتتىڭ ناۋقاس ەكەنىن جازعان.

وتتو ۋورمبير اتا-اناسىنىڭ مالىمدەمەسىندە «سولتۇستىك كورەيا رەجيمىنىڭ ءبىزدى جانە ۇلىمىزدى قالاي قورلاعانى تۋرالى بۇكىل الەمنىڭ حاباردار بولعانىن قالايمىز» دەلىنگەن. ۋاشينگتون سولتۇستىك كورەيانى ءۋورمبيردى ساياسي تۇتقىن رەتىندە پايدالاندى دەپ ايىپتاپ، وعان كەسىلگەن جازانى جاساعان قىلمىسىنا ساي ەمەس دەپ سىنعا العان بولاتىن.

"The Qazaq Times"