فوتو: https://cdni.rt.com

ۆەنەسۋەلاداعى احۋالدى بۇۇ باقىلاۋعا الماق. ۇيىمنىڭ باس كوميسسارى ميشەل باچەلەتتىڭ ساپارى بارىسىندا قوس تاراپ وسىنداي كەلىسىمگە كەلدى.

مالىمەتتەر بويىنشا، بۇۇ وكىلدەرى ەلگە تەحنيكالىق تۇرعىدان قولداۋ كورسەتەدى. وسى ماقساتتا باچەلەت رەسمي كاراكاسپەن ساياسي تۇتقىندار ماسەلەسىن دە تالقىلاعان. قازىر ۆەنەسۋەلا تۇرمەلەرىندە 700 ساياسي تۇتقىن وتىر.

وسىعان دەيىن ۆەنەسۋەلا اسسامبلەياسى ەلدەگى وپپوزيتسيا باسشىسى حۋان گۋايدونى قۇقىقتىق يممۋنيتەتىنەن ايىرۋ تۋرالى ۇكىم شىعارعان. اتالعان جاعدايدان كەيىن گۋايدونىڭ ءوزى جەرگىلىكتى باق وكىلدەرىنە سۇحبات بەرىپ، «ارنايى قىزمەتكەرلەر قاستاندىق جاساماق» دەپ مالىمدەگەن. ونىڭ ايتۋىنشا، ەلدەگى بىردە-ءبىر قۇرىلىمدا قۇقىقتىق يممۋنيتەتتەن ايىرۋ قۇقىعى جوق. كەيىننەن مادۋرو تارابى بۇۇ ۇسىنعان ماتەريالدىق كومەكتەن باس تارتقان بولاتىن.

ۆەنەسۋەلاداعى ساياسي داعدارىس قاڭتاردا ۋشىعا تۇسكەن. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان گۋايدو ءوزىن ۋاقىتشا ۇكىمەتتىڭ باسشىسى دەپ جاريالاعان بولاتىن. گۋايدونى اقش-پەن قوسا 50-دەن استام ەل قولدادى. ال قىتاي مەن رەسەي تاراپى قازىرگى باسشى نيكولاس مادۋرو ۇكىمەتىنە سەنىم ءبىلدىرىپ، بيلىككە وزگە مەملەكەتتەردىڭ ارالاسۋىن «حالىقارالىق قۇقىقبۇزۋشىلىق» دەپ اتادى.

"The Qazaq Times"