مارين لە پەن: ەۋروپالىق وداقپەن قوشتاساتىن كەز جەتتى!

فرانتسيا ۇلتتىق مايدان پارتياسىنىڭ جەتەكشىسى، پرەزيدەنتتىككە ۇمىتكەر مارين لە پەن فرانتسيا بەيبىت تۇردە ەۋروپالىق وداقتان شىعۋى كەرەك دەپ جار سالۋدا. بۇنى ول پاريجدە وتكەن دابىرالى ءباسپاسوز ماجىلىسىندە ايتقان بولاتىن. بۇل تۋرالى تۇركيا «انادولى» اقپاراتتىق اگەنتتىگى حابارلاپ وتىر.

مارين لە پەن ەۋرونىڭ فرانتسيا، يتاليا، يسپانيا قاتارلى ەلدەردىڭ ۇلتتىق ونەركاسىبىنە ايتارلىقتاي كەرى اسەرىن تيگىزگەنىن العا تاراتا كەلە، «ەشبىر مەملەكەت ءوزىنىڭ ۇلتتىق ونەركاسىبىن قورعاماي تۇرا المايدى، مەنىڭ مىندەتىم سول – حالىقتىڭ سەنىمىنە لايىق بولىپ، ءوز ەكونوميكامىزدى كۇشەيتۋ»، – دەدى.

ۇلتتىق مايدان پارتياسى قازىر فرانتسيادا كۇشتى قولداۋعا يە بولىپ كەلە جاتقان پارتيا. پارتيا جەتەكشىسىنىڭ اقش پرەزيدەنتى دونالد ترامپپەن دە تىعىز قارىم-قاتىناسى بار ەكەنى دە بەلگىلى. مارين لە پەن ءوزىنىڭ ەكونوميكالىق جوسپارلارىن بايانداعان كەزدە ونىڭ ترامپتىڭ ساياساتىن ۇلگى تۇتاتىنى انىق بولدى. ول فرانتسياعا دا ترامپتىڭ جۇمىسپەن قامتۋ ساياساتىن جالپىلاستىرماق. سونىمەن قاتار، ترامپتىڭ بارلىق وداقتاردان باس تارتىپ، جەكەلەگەن ەلدەرمەن ەكى جاقتى ىنتىماقتاستىق ساۋدا كەلىسىمىن جاساۋىن بيىك پاراساتتىلىققا بالاۋدا، الدا فرانتسياعا دا سولاي ىستەۋگە تۋرا كەلەتىنىن دە قايتالاي ايتتى. ول: «ەۋروپالىق وداقپەن بەيبىت تۇردە قوشتاساتىن كەز جەتتى»، – دەپ ءسوزىن تۇيىندەدى.

مارين لە پەن پارتياسى فرانتسيا ازاماتتارىنىڭ ەو-دان باس تارتۋىن جاقتاپ، فرانتسۋز ونەركاسىبىن دامىتۋدى ۇران ەتىپ كەلەدى. ەلدەگى ونى قولداۋشىلار كۇننەن كۇنگە كوبەيە تۇسپەك. سەبەبى، ۇلىبريتانيانىڭ ەو-دان شىعۋى، وداقتىڭ بار اۋىرتپالىعىن فرانتسيا مەن گەرمانيانىڭ موينىندا قالادى. وزىنە ەشقانداي دا يگىلىگى جوق ەلدەردىڭ جۇگىن سۇيرەپ جۇرگىسى كەلمەيتىنى انىق. ەو جاعدايى وسىلاي جالعاسا بەرسە، گەرمانيادان دا ەو-دان اينىپ، نەمىس مۇددەسىن قولداۋشىلار شىعارى انىق. ولاي بولسا ايتىلمىش ەۋروپالىق وداقتىڭ كۇنى باتتى دەي بەرىڭىز.

“The Qazaq Times”