ەو رەسەيگە قارسى سانكتسيالاردى قالپىنا كەلتىردى

ەۋروپالىق وداقتىڭ حالىقارالىق ىستەر بويىنشا جەتەكشىسى فەدەريكا موگەريني رەسەيگە قارسى باعىتتالعان سانكتسيالاردىڭ قايتا قالپىنا كەلتىرىلگەنىن ايتتى.

20minutes.fr اگەنتتىگىنىڭ حابارلاۋىنشا، 2014 جىلى رەسەيگە قارسى سانكتسيالار ەنگىزىلگەننەن كەيىن ماسكەۋدە ەۋروپالىق ەلدەردىڭ ونىمدەرىنە يمپورتتىق شەكتەۋلەر قويىلعان. موگەريني سوزىندە: «بۇل جاعداي ەۋروپالىق وداقتىڭ اگروونەركاسىپ كەشەنى ءۇشىن ماسەلە تۋعىزعانىمەن، اتالعان سالا سەكتورلارى بالاما نارىققا شىقتى. رەسەيدىڭ ازىق-تۇلىك ەمبارگوسىنان تۋىنداعان قيىندىقتارعا قاراماستان، ەو-نىڭ اۋىلشارۋاشىلىق ونەركاسىبى تاماشا جەتىستىك كورسەتتى»، – دەپ مالىمدەدى. ونىڭ ايتۋىنشا، رەسەي مەن ەۋروپا اراسىنداعى سانكتسيالار سوعىسى رەسەيگە الدەقايدا ەلەۋلى اسەر ەتكەن.

وسىعان دەيىن ەۋروپالىق وداق كەرش بۇعازىندا ورىن العان جاعدايعا بايلانىستى رەسەيگە قارسى سانكتسيا ەنگىزۋدى قاراستىرعان بولاتىن. اقپاندا وداق قۇرامىنداعى ەلدەر سانكتسيالىق شارا اياسىندا جاڭا تىزىمدەر جاسادى. ەو-نىڭ ۋاقىتشا توراعا قىزمەتىن اتقارۋشى، اۋستريا سىرتقى ىستەر ءمينيسترى كارين كنايسل جەلتوقساندا وتەتىن سامميتتە وداق ەلدەرىنىڭ باسشىلارى ازوۆتا ۋكراينانىڭ ءۇش اسكەري كەمەسىن ەكيپاجىمەن قوسا باسىپ العانى ءۇشىن رەسەيگە سالىنعان سانكتسيالاردى قاتاڭداتۋ ماسەلەسىن قاراستىراتىنىن مالىمدەگەن. بۇل ۇسىنىسقا ەستونيا، پولشا قولداۋ بىلدىرسە، گەرمانيا مەن فرانتسيا قارسى شىقتى. بىراق، ەو باسشىلىعى وسى ۋاقىتقا دەيىن ورىن العان جايتتاردان كەيىن وداق قۇرامىنداعى ەلدەر ماسكەۋگە قارسى سالىناتىن سانكتسيالىق رەجيمدى ءبىر اۋىزدان قولداۋى ءتيىس دەپ مالىمدەگەن.

"The Qazaq Times"