جاپون پرەمەرى يران ساپارىن باستايدى. فوتو: ۆەستنيك كاۆكازا.

بۇگىن جاپونيا پرەمەر-ءمينيسترى شينزو ابە تەھرانعا (تەگەران) جەتىپ، يرانداعى رەسمي ساپارىن باستايدى. جاپونيا باس ءۋازىرىنىڭ يران ساپارى 3 كۇنگە جالعاسادى دەپ كۇتىلۋدە. 

شينزو ابو كەزەكتى ساپارىندا ير رۋحاني كوسەمى اياتوللا الي حامەنەي جانە پرەزيدەنت حاسان رۋحانيمەن كەزدەسەدى. جاپونيا ۇكىمەتىنىڭ كەشەگى مالىمدەمەسىندە، پرەمەر-مينيستر شينزو ابە يراننىڭ جوعارى لاۋازىمدىلارىمەن كەزدەسۋدە اقش پەن يران اراسىنداعى ماسەلەلەردى تالقىعا سالاتىنىن ايتقان.

جاپونيانىڭ باس ءۋازىرى يران جوعارى لاۋازىمدىلارىمەن اقش-تىڭ يادرولىق كەلىسىمنەن ءبىر جاقتى شىعىپ كەتۋىن، اقش-يران قايشىلىعىن ازايتۋ جانە اقش-تىڭ ەكونوميكالىق سانكتسيالارىنىڭ كۇشىن جويۋ ماسەلەلەرىن كەڭەسەدى. ەستەرىڭىزدە بولسا، اقش پرەزيدەنتى دونالد ترامپ جاپونياداعى مەملەكەتتىك ساپارى كەزىندە پرەمەر-ءمينيسترى ابەنى اقش پەن يران اراسىنداعى قايشىلىقتى ازايتۋعا قولداۋ كورسەتۋىن وتىنگەن بولاتىن.

قازىر، يران مەن اقش اراسىنداعى قايشىلىقتاردى ازايتىپ، سوعىستىڭ الدىن الۋ، ەكى ەلدىڭ قارىم-قاتىناسىن جاقسارتۋعا ءۇشىنشى تاراپتاردىڭ ءرولى باسىمىراق. سەبەبى، يران مەن اقش ۇقساماعان قۇندىلىقتاردى ۇستانعان، ساياسي تەكە-تىرەستە تۇرعان ەلدەر. ال، جاپونيانىڭ اقش پەن يران اراسىنداعى قارىم-قاتىناسىن رەتتەۋدەگى مۇمكىندىگى ەۋروپا ەلدەرىنەن جوعارى. جاپونيا اقش-پەن جاقىن وداقتاس بولعانىمەن، يرانمەن تەرەڭ بايلانىس ورناتقان ەل. ونىڭ ۇستىنە يران مۇناي ەكسپورتىندا دا جاپونيانىڭ الاتىن ورىنى جوعارى. ساۋدا-ەكونوميكالىق، مادەني بارىس-كەلىستەرى دە ءبىرشاما جوعارى دەڭگەيدە.

سوندىقتان دا، جاپون پرەمەر-ءمينيسترىنىڭ يران ساپارى اقش-يران داعدارىسىنا بەتبۇرىس اكەلۋى  مۇمكىن دەپ كۇتىلۋدە.

“The Qazaq Times”