جاپوننىڭ جاڭا پرەمەرى فۋميدو كيشيدا. فوتو; VOA.

جاپونيانىڭ ۇكىمەت تىزگىنىن قولىنا الىپ جاتقان فۋميدو كيشيدا ۇكىمەت قۇرامىنا قىتايعا قارسى قاتاڭ ۇستانىمداعى كادرلاردى جيناپ جاتىر. ايتالىق، بۇرىنعى قورعانىس ءمينيسترى ناكاتاني موتومەنى ادام قۇقىقتارى جونىندەگى ىستەرمەن ارنايى اينالىساتىن كومەكشىسى ەتىپ تاعايىنداماق. ساراپشىلار، پرەمەر-ءمينيسترى كيشيدانىڭ بۇل شەشىمىن قىتايداعى اسىرەسە شىڭجاڭ مەن گونكونگتاعى ادام قۇقىعى ماسەلەلەرىنە قاتىستى قاتاڭ ۇستانىم تانىتۋى دەپ باعالاپ وتىر.

بيىل 64 جاستاعى ناكاتاني شينزو ابە تۇسىندا قورعانىس ءمينيسترى بولعان. جاڭا جۇمىسقا كىرىسۋ الدىندا ناكاتاني موتومە جۋرناليستەرگە جاساعان مالىمدەمەسىندە: «ءبىز حالىقارالىق ادام قۇقىقتارى ماسەلەسىن شەشۋ ءۇشىن سىرتقى ىستەر، ەكونوميكا، ساۋدا-ونەركاسىپ مينيسترلىكتەرىمەن تىعىز جۇمىس ىستەيتىن بولامىز»، – دەگەن ول ءوزىنىڭ بۇعان دەيىنگى وسى سالاداعى تاجىريبەلەرىن پايدالانا وتىرىپ، ادام قۇقىعى ماسەلەسىندە بەلسەندى قىزمەت ىستەيتىنىن جەتكىزگەن.

فۋميدو كيشيدا سەنبى كۇنى سىرتقى ىستەر ءمينيسترى ەتىپ بۇرىنعى مادەنيەت، سپورت، عىلىم جانە تەحنيكا مينيسترلىگىن باسقارعان لي فانجەندى تاعايىندادى.

ناكاناني مەن فانجەن عانا ەمەس، مينيسترلەر كايبەتىن باسقارىپ تۇرعان حيتوحيكو يسوزاكي دە قىتايعا قارسى قاتاڭ ۇستانىمداعى جاپون ساياساتكەرى رەتىندە بەلگىلى. ول بۇگىن تۇستەن بۇرىنعى مالىمدەمەسىندە فۋميدو كيشيدانىڭ ليبەرال-دەموكراتيالىق پارتياسىنىڭ ۇمىتكەرى رەتىندەگى ۋادەلەرىن قايتالاپ: «ءبىز تايۋان بۇعازىنىڭ تۇراقتىلىعىنا، گونكونگتىڭ دەموكراتياسىنا جانە ۇيعىرلاردىڭ ادام قۇقىقتارى ماسەلەلەرىنە قاتاڭ كوزقاراسپەن جاۋاپ بەرۋىمىز كەرەك. سونداي-اق، اقش-جاپون وداعىنا سۇيەنە وتىرىپ، دەموكراتيا، زاڭ ۇستەمدىگى جانە جالپىادامزاتتىق قۇندىلىقتاردى ساقتاۋىمىز كەرەك. ادام قۇقىقتارىن قورعاۋ جانە حالىقارالىق ءتارتىپتىڭ تۇراقتىلىعىن ساقتاۋعا ۇلەس قوسۋىمىز ءتيىس»، – دەپ مالىمدەدى.

ساراپشىلاردىڭ پىكىرىنشە، جاپونيانىڭ باس ءۋازىرى وسى ۋادەلەرىن جۇزەگە اسىرۋ ءۇشىن ءوزىنىڭ ادام قۇقىقتارى جونىندەگى ارنايى كومەكشىسى ەتىپ  ناكاناني تاعايىنداعان.

جاپون ۇكىمەتىندەگى بۇل وزگەرىستەر تۋرالى بۇگىن قىتاي ءسىم تارابى ەلەۋلى پىكىر بىلدىرگەن جوق. تەك، ونى «جاپونيانىڭ ىشكى ءىسى» دەپ قانا باعالادى. دەگەنمەن، جاپون ۇكىمەتىنىڭ جاڭا قۇرامىنا قاراپ الداعى ۋاقىتتا جاپون-قىتاي قاتىناسىندا بەلگىلى وزگەرىستەردىڭ بولۋى مۇمكىن ەكەنىن بولجاۋعا بولادى.