ۆەنەسۋەلاداعى وپپوزيتسيا جەتەكشىسى حۋان گۋايدو. فوتو: https://portal.andina.pe

ۆەنەسۋەلا وپپوزيتسياسىنىڭ كوشباسشىسى حۋان گۋايدو ەلدەگى ماسەلەنى شەشۋ ماقساتىندا نورۆەگيانىڭ كومەگىنە جۇگىنبەك. بۇل تۋرالى Politico باسىلىمى حابارلادى.

ۆەنەسۋەلا حالقىن قالاي دا داعدارىستان الىپ شىعۋعا بەل بۋعان گۋايدو ەلدىڭ قازىرگى پرەزيدەنتى نيكولوس مادۋرومەن كەلىسسوز جۇرگىزۋدەن باس تارتىپ وتىر. كەلەسى اپتادا ۆەنەسۋەلا پرەزيدەنتىنىڭ جاقتاستارى وسلو قالاسىندا وپپوزيتسيا وكىلدەرىمەن كەزدەسىپ، ەلدە بولىپ جاتقان ساياسي قاقتىعىستار پەن مۇددەلەر قايشىلىعى جونىندە كەلىسسوزدەر جۇرگىزبەك. دەگەنمەن، مادۋرو كەزەكتەن تىس سايلاۋ وتكىزۋ تۋرالى شەشىمدى رەسمي تۇردە ماقۇلداعان جوق.

وپپوزيتسيونەردىڭ ايتۋىنشا، ونىڭ نورۆەگيامەن كۇش بىرىكتىرۋى پرەزيدەنت پەن ەلدەگى بيلىك قۇرىلىمدارىنىڭ اۋىسۋىنا الىپ كەلۋى ءتيىس. ەگەر جاعداي تيىسىنشە ورىن الماسا، ۆەنەسۋەلادا تاعى دا جاپپاي نارازىلىق باستالادى. بۇعان دەيىن مادۋرو ۇكىمەتى مەن نورۆەگياداعى وپپوزيتسيا وكىلدەرىنىڭ كەلىسسوزدەرى تۋرالى حابارلانعان بولاتىن. گۋايدو نورۆەگياداعى كەزدەسۋدى كەلىسسوزدەر دەپ اتاۋعا بولمايدى دەگەن مالىمدەمە جاسادى جانە بۇل تەك ديالوگتى جولعا قويۋ ارەكەتى عانا.

وسىعان دەيىن ۆەنەسۋەلا اسسامبلەياسى حۋان گۋايدونى قۇقىقتىق يممۋنيتەتىنەن ايىرۋ تۋرالى ۇكىم شىعارعان.  اتالعان جاعدايدان كەيىن گۋايدونىڭ ءوزى جەرگىلىكتى باق وكىلدەرىنە سۇحبات بەرىپ، «ارنايى قىزمەتكەرلەر قاستاندىق جاساماق» دەپ مالىمدەگەن. ونىڭ ايتۋىنشا، ەلدەگى بىردە-ءبىر قۇرىلىمدا قۇقىقتىق يممۋنيتەتتەن ايىرۋ قۇقىعى جوق.

ۆەنەسۋەلاداعى ساياسي داعدارىس قاڭتاردا ۋشىعا تۇسكەن. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان گۋايدو ءوزىن ۋاقىتشا ۇكىمەتتىڭ باسشىسى دەپ جاريالاعان بولاتىن. گۋايدونى اقش-پەن قوسا 50-دەن استام ەل قولدادى. ال قىتاي مەن رەسەي تاراپى قازىرگى باسشى نيكولاس مادۋرو ۇكىمەتىنە سەنىم ءبىلدىرىپ، بيلىككە وزگە مەملەكەتتەردىڭ ارالاسۋىن «حالىقارالىق قۇقىقبۇزۋشىلىق» دەپ اتادى.

"The Qazaq Times"