ءسۇريا جەرىندەگى لاگەرلەردەگى تۇتقىندار. فوتو: The Garden Island.

تەررورلىق توپتىڭ قاتارىندا سوعىسقان 3 فرانتسيالىق ازامات يراكتا ءولىم جازاسىنا كەسىلدى.  بۇلاردان تىس 9 فرانتسيا ازاماتى ءسۇريا جەرىندە تۇتقىندالىپ، اقپان ايىندا يراك سوتىنا تارتىلعان ەدى. ءولىم جازاسىنا كەسىلگەن فرانتسيا ازاماتتارى 30 كۇن ىشىندە اپەللياتسيالىق شاعىم تۇسىرۋىنە قۇقىعى بار. بۇل تۋرالى BBC مەن فرانتسيانىڭ FPA اقپارات اگەنتتىگى حابار تاراتتى. 

يراك سوتى ولىمگە ۇكىم ەتكەن  فرانتسيالىقتاردىڭ ءبىرى – 32 جاستاعى كەۆين گونو. ول 2017 جىلى جەلتوقساندا ءسۇريا جەرىندە وتباسىمەن بىرگە قولعا تۇسكەن. فرانتسيا تارابى ونىڭ سىرتتا 9 جىلعا سوتتاعان. تاعى ءبىرى ساليم ماچۋ  "يسلام مەملەكەتى" تەررورلىق ۇيىمنىڭ ەۋروپاداعى توبىنا قىزمەت ەتكەن دەلىنەدى. ول قاتىسقان تەررورلىق توپ يراك، ءسۇريا ەلدەرىندە جانە پاريج بەن بريۋسسەل قالالارىندا تەررورلىق شابۋىل ۇيىمداستىرعان دەپ ايىپتالعان. ال، 32 جاستاعى لەونارد لوپەس ايەلى جانە ەكى بالاسىمەن "يم" توبى باقىلاۋىنا العان موسۋل قالاسىندا تۇرعان. موسۋل شايقاستان كەيىن ءسۇريا جەرىنە وتكەن جانە سول ەلدە تۇتقىندالىپ، يراكقا اپارىلعان.

قازىرگى كەزدە، تەررورلىق توپ قاتارىندا سوعىسقان مىڭداعان شەتەلدىك ءسۇريانىڭ دەموكراتيالىق كۇشتەرىنىڭ قولىندا قاماۋدا تۇر. ولاردىڭ وتباسى مۇشەلەرى دە ارنايى لاگەرلەردە كۇن وتكىزۋدە. ءسۇريا جەرىندەگى قولعا تۇسكەن تەررورلىق توپ مۇشلەرەىن قالاي ءبىرجايلى ەتۋ ماسەلەسى داعدارىستا تۇر. ال، يراك ۇكىمەتى سوت ارقىلى ۇكىمەت شىعارىپ جاتىر. ءتىپتى، ءسۇريا جەرىندە قولعا تۇسكەن كوپتەگەن شەتەلدىك سودىرلار مەن ونىڭ وتباسى مۇشەلەرى يراك ۇكىمەتىنە وتكىزىلىپ بەرىلدى. الايدا، ولاردىڭ ءولىم جازاسىنا كەسىلگەنى العاش رەت بولىپ وتىر.

حالىقارالىق قۇقىق قورعاۋ ۇيىمدارى يراك سوتىنىڭ شەشىمىن سىنعا الۋدا. الايدا، فرانتسيا تارابى بۇل تۋرالى رەاكتسيا تانىتقان جوق.

وزدەرىن "يسلام مەملەكەتى" اتاعان تەررورلىق توپ 2014 جىلى يراكتىڭ سولتۇستىگىندەگى موسۋل شاھارىندا "حاليفات" جاريالاپ، ارتىنشا يراك پەن ءسۇريانىڭ باسىم كوپ ايماقتارىن باسىپ الدى. بىرنەشە جىلعا سوزىلعان سوعىستاردان كەيىن يراك ارمياسى 2017 جىلدىڭ سوڭىنا قاراي موسۋلدى ازات ەتىپ، "يم" توبىنا قارسى سوعىستا جەڭىسكە جەتكەنىن جاريالاعان. ءسۇريا جەرىندەگى "يم" توبىنىڭ سوڭعى بەكىنىسى بيىل ناۋرىز ايىندا تالقاندالىپ، ەكى ەلدەگى تەررورلىق توپتىڭ نەگىزگى كۇشى جويىلدى.

"يم" توبىنا قوسىلعان شەتەلدىك تۇتقىنداردى ەلىنە قايتارۋ ءىسى تەز ارادا شەشىلەتىن ەمەس. سەبەبى، كەيبىر ەلدەر ءوز ازاماتتارىن قايتارىپ الىپ كەتۋگە ىنتالى ەمەس. ولاردى قالاي بىرجاقتى ەتۋدە ءار ەل ءار ءتۇرلى تاجىريبەلەردى قولدانۋدا. سۇرياداعى ارنايى لاگەرلەردە تۇرىپ جاتقان ايەلدەر مەن بالالاردىڭ سانى دا ون مىڭداپ سانالادى. قازاقستان رەسپۋبليكاسى ورتالىق ازيادان العاش رەت ءسۇريا مەن يراكتاعى تەررورلىق توپ قاتارىنا قوسىلعان ازاماتتارىن ەلىنە قايتارعان بولاتىن. جاقىندا تاجىكستاندا ءوزىنىڭ ازاماتتارىن ەلىنە الىپ كەلدى.

“The Qazaq Times”