ترامپ امەريكالىق ءىرى كاسىپكەرلەرمەن كەزدەسۋدە ماڭىزدى مالىمدەمە جاسادى. فوتو: Washington Post.

اقش پەن قىتاي اراسىنداعى ساۋدا كەلىسىمىندە Huawei  كومپانياسى تۋرالى جاڭا تارماقتار ەنگىزىلۋى مۇمكىن. اقش پرەزيدەنتى دونالد ترامپ بەيسەنبى كۇنى جاساعان مالىمدەمەسىندە وسىنداي دەدى. ول قىتايلىق Huawei ونىمدەرى اقش-تىڭ ۇلتتىق قاۋىپسىزدىك پەن اسكەري قاۋىپسىزدىك پەرسپەكتيۆاسىنا "اسا قاۋىپتى" ەكەنىن، سوندىقتان دا، ەكى ەل اراسىنداعى ساۋدا كەلىسىمىندە Huawei ونىمدەرىنە بايلانىستى ارنايى بەلگىلەمە قاراستىرىلۋى مۇمكىن ەكەنىن ايتتى. 

پرەزيدەنت ترامپ ەكى ەل اراسىنداعى كەلىسىم تارماقتارىندا Huawei تۋرالى ارنايى تارماقتار بولعاندا عانا كەلىسىم  تولىققاندى دەپ سانايتىنىن اڭعارتتى. دەگەنمەن، قۇراما شتات تارابى اتالعان قىتايلىق كومپانيا تۋرالى ناقتى قانداي بەلگىلەمە ۇسىناتىنى تۋرالى انىق ايتپاعان. ء"بىز بۇنى الداعى ۋاقىتتا ايتاتىن بولامىز", – دەگەن پرەزيدەنت ترامپ.

وتكەن اپتادا اقش پرەزيدەنتى قىتايلىق تەلەكوممۋنيكاتسيا كومپانياسىنا شەكتەۋ قويۋ مۇمكىندىگى بار جاڭا بۇيرىققا قول قويدى. بۇل جاڭا ەرەجە بويىنشا قۇراما شتاتتاعى "شەتەلدىك باسەكەلەستەرىمەن" بايلانىسى بار كومپانيالارعا اقش تەلەكوممۋنيكاتسيا جۇيەسىنىڭ جابدىقتارى مەن تەحنولوگيالارى بەرىلمەيدى. بۇل اقش-تىڭ "حۋاۆەي"-مەن ىستەستىك ورناتقان كومپانيالارىنا باعىتتالعان شەكتەۋ. ارينە ول قىتايلىق تەحنولوگيا الىبىنىڭ اقش-تاعى اياسىن تارىلتىپ جىبەرمەك.

اقش ساۋدا مينيسترلىگى دە وسىمەن ءبىر ۋاقىتتا مالىمدەمە جاساپ، قىتايلىق "حۋاۆەي" كومپانياسىنىڭ ونىمدەرى اقش-تىڭ ۇلتتىق قاۋىپسىزدىك جانە سىرتقى ساياسات مۇددەلەرىنە زيان كەلتىرگەنىن قايتالادى. مينيسترلىك اقش كومپانيالارىنا "حۋاۆەي" ونىمدەرىن بەرۋگە تىيىم سالدى.

“The Qazaq Times”