«اديداس» پەن «نايك» باستاعان برەندتەر ترامپتى ساۋدا سوعىسىن توقتاتۋعا شاقىردى

تانىمال برەند يەلەرى 173 كومپانيا اقش پرەزيدەنتى دونالد ترمپقا حات جولداپ، قىتايمەن ساۋدا سوعىسىن توقتاتۋعا شاقىردى. ولاردىڭ قاتارىندا «اديداس» پەن «نايك» جانە «كونۆەرس» سەكىلدى الەمگە تانىمال برەندتەر دە بار. ولار ترامپتىڭ تاريفتەردى كوتەرۋ شەشىمى «كاتاستروفالىق جاعدايعا» ۇرىندىرادى دەپ قارايدى.

اتالعان اياق كيىم ءوندىرۋشى برەندتەر ساۋدا سوعىسىنان كوبىرەك زارداپ شەگىپ جاتقانى ايتىلادى. نەگىزىندە، ەرەجەلەرگە ساي اياق كيىمدەردىڭ كەدەن سالىعى 11,3 پايىز بولعانىمەن، كەيبىر جاعدايدا اياق كيىم وندىرۋشىلەر 67,5 ايىز سالىق تولەۋىنە تۋرا كەلگەن. ەگەر تاريفتەر تاعى 25 پايىزعا كوتەرىلگەن جاعدايدا اياق كيىمدەردىڭ يمپورتتاۋ قۇنى 100 پايىزعا دەيىن كوتەرىلىپ كەتەدى. بۇل اتالعان امەريكالىق برەندتەر ءۇشىن تولىقتاي داعدارىس قاۋپىن كورسەتەدى.

اقش پرەزيدەنتىنە جازىلعان اشىق حاتتا، كەدەن سالىعىن 25 پايىزعا كوتەرۋ شەشىمىنەن ەڭ اۋەلى تۇتىنۋشىلار زارداپ شەگەدى، بۇل بىرقاتار امەريكالىق كومپانيالاردىڭ بولاشاعىنا بالتا شابۋمەن تەڭ دەپ باعالاعان.  اياق كيىم ءوندىرۋشى برەندتەر  كەزەكتى ساۋدا سوعىسىنان كوبىرەك زارداپ شەگىپ جاتقانىن العا تارتتى.

قىتايدىڭ اقش-تاعى يمپورت تاۋارلارىنا باعىتتالعان تاريفتىك بەلگىلەمە، امەريكالىق وندىرۋشىلەرگە قالاي كەرى اسەر ەتىپ وتىر؟ سەبەبى، امەريكالىق كوپتەگەن وندىرۋشىلەردىڭ زاۋىتتارى قىتايدا ورنالاسقان. ولار ەڭبەك كۇشى مەن جاسالۋ قۇنى ارزان بولعان قىتايدا تاۋار ءوندىرىپ، ءوز ەلىنىڭ بازارىنا الىپ كەلەدى. بۇعان دەيىن بۇل الماسۋدان امەريكالىق ءوندىرۋشى كاسىپكەرلەر تابىسىن ەسەلەپ كەلگەن. اقش پرەزيدەنتى مالىمدەمەسىندە امەريكالىق وندىرۋشىلەردىڭ زاۋىتتاردى اقش-قا كوشىرۋگە بولاتىنىن ايتقان. الايدا، كاسىپكەرلەر: «زاۋىتتاردى ءبىر-اق كۇندە كوشىرىپ كەلۋ مۇمكىن بە؟ بۇل اقىلعا سىيمايدى»، – دەگەن پىكىرلەر ايتادى.

ترامپ ساۋدا سوعىسى باستالۋدان بۇرىن، كەزەكتەسكەن تاريفتىك سوققىلاردان كەيىن قوس تاراپ بىردەي زارداپ شەگەتىنىن، الايدا، ساۋدا سوعىسى ۇزاققا سوزىلسا ونىڭ جەڭىمپازى اقش بولاتىنىن ايتقان بولاتىن.

“The Qazaq Times”