ۇلىبريتانيا پرەمەر-ءمينيسترى تەرەزا مەي وتستاۆكاعا كەتۋى مۇمكىن.

«The Times» باسىلىمىنىڭ مينيسترلەر كابينەتىندەگى دەرەك كوزىنىڭ مالىمەتىنشە، تەرەزا مەي ءوزىنىڭ وتستاۆكاعا كەتۋى جونىندە مامىر ايىنىڭ 24-ءى كۇنى جاريالاۋى مۇمكىن. مەيدىڭ بۇنداي قادامعا بارۋىنا Brexit ماسەلەسىنىڭ شەشىلمەۋى سەبەپ بولماق. سەبەبى وسى ۋاقىتقا دەيىن ۇكىمەت مۇشەلەرى ۇلىبريتانيانىڭ ەۋرووداق قۇرامىنان شىعۋىنا بايلانىستى قانداي دا ءبىر كەلىسىمگە كەلە الماعان.

«The Daily Telegraph» باسىلىمىنىڭ بولجامى بويىنشا، مەي ءوزىنىڭ وتستاۆكاعا كەتەتىندىگىن 27 مامىر كۇنى داۋنينگ-ستريتتەگى حالىقپەن كەزدەسۋدەن كەيىن جاريالايدى. ويتكەنى مەي جاقتاستارىنىڭ پىكىرىنشە، ءدال قازىر وتستاۆكاعا كەتۋ حالىق تاراپىنان جوعارى باعالانادى. ال بۇدان كەشىگەتىن بولسا، حالىق الدىنداعى بەدەلى تومەندەپ، قىزمەتتەن ەرىكسىز كەتۋگە تۋرا كەلەدى.

تەرەزا مەيدىڭ كوپتەگەن جاقتاستارى ول دەپۋتاتتارعا «ۇلىبريتانيانىڭ ەۋرووداق قۇرامىنان شىعۋىنا بايلانىستى قايتادان رەفەرەندۋم وتكىزۋ قاجات» - دەپ ۇسىنعاننان كەيىن قارسى شىققان. ەۋرووداق پەن ۇلىبريتانيا Brexit ماسەلەسىن شەشۋدى 31 قازانعا دەيىن كەيىنگە قالدىرعان. بىراق كەلىسىم بويىنشا، لوندون وداقتان شىعۋعا بايلانىستى زاڭ جوباسىن 2019 جىلدىڭ 22 مامىرىنا دەيىن راتيفيكاتسيالاۋى ءتيىس بولعان.

"The Qazaq Times"