يران ۋران بايىتۋدى ءتورت ەسەگە كوبەيتتى

يران ۋران بايىتۋدى ءتورت ەسەگە كوبەيتتى.

«Tasnim» اقپارات كوزىنىڭ مالىمەتىنشە، مامىر ايىنىڭ 20-ى كۇنى يران ۇلتتىق قاۋىپسىزدىك كەڭەسىنىڭ شەشىمى بويىنشا ۋران بايىتۋ ءتورت ەسەگە ارتىرىلعان. تەھران ءوزىنىڭ بۇل شەشىمى تۋرالى ماگاتە-گە ەسكەرتكەن. بىراق ازىرگە اتالمىش ۇيىم يرانعا بايدانىستى قانداي دا ءبىر مالىمدەمە جاسامادى.

«Associated Press» اقپارات اگەنتتىگىنىڭ بولجامى بويىنشا، يران ۋران بايىتۋدى ءتورت ەسەگە ارتتىرۋ ارقىلى يادرولىق كەلىسىمدە بەكىتىلگەن نورمالاردان اسىپ كەتەدى.

مامىر ايىنىڭ باسىندا يران يادرولىق كەلىسىمنىڭ بىرقاتار بولىكتەرىن ورىندامايتىندىعىن مالىمدەگەن. كەيىننەن پارسى شىعاناعىندا اقش پەن يران اراسىنداعى تەكەتىرەس بۇرىن سوڭدى بولماعان جاعدايعا جەتكەن. اقش تەھران تاراپىنان ءتونۋى مۇمكىن قاۋىپتەردى جەلەۋ ەتىپ، پارسى شىعاناعىنا اۆراام لينكولن باستاعان جەتى اسكەري كەمەسى مەن Patriot زىمىران جۇيەسىن ورنالاستىرعان.

ءوز كەزەگىندە يراننىڭ رۋحاني كوسەمى اياتوللا ءالي حامەنەي: «تەھران ۋاشينگتونمەن سوعىسۋعا مۇددەلى ەمەس، بىراق اقش-قا قارسى كۇرەسىن جالعاستىرادى» - دەپ مالىمدەگەن.

"The Qazaq Times"