قىرعىزستان پرەزيدەنتى سوورونباي جەەنبەكوۆ جانە ەكس-پرەزيدەنت المازبەك اتامباەۆ. فوتو: http://politanalyse.com/

قىرعىزستان پرەزيدەنتى سوورونباي جەەنبەكوۆ «ەكس-پرەزيدەنتتەردى جاۋاپقا تارتۋ تۋرالى» زاڭعا قول قويدى. بۇل تۋرالى رolitanalyse.com حابارلادى.

4 ساۋىردە قىرعىزستان بيلىگى «قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى»  زاڭ قابىلداعان بولاتىن. كەيىننەن قۇجات اۆتورلارى جەەنبەكوۆكە اتالعان زاڭعا وزگەرىستەر ەنگىزۋ تۋرالى ۇسىنىس بىلدىرگەن. قىرعىز باسىلىمدارىنىڭ حابارلاۋىنشا، زاڭنىڭ 11-بابى بويىنشا ەكس-پرەزيدەنت مەملەكەتتىك بيلىك ورگاندارىندا ساياسي، ارناۋلى مەملەكەتتىك لاۋازىمداردى اتقارماۋى ءتيىس. ەگەر ەكس-پرەزيدەنت ەرەجەلەردى بۇزسا، باس پروكۋروردىڭ ۇسىنىسىنا سايكەس بۇرىنعى پرەزيدەنت رەسپۋبليكالىق بيۋدجەت قاراجاتى ەسەبىنەن ماتەريالدىق جاعىنان قامتاماسىز ەتۋدەن جانە ارنايى كەپىلدىكتەردەن ايىرىلادى.

قۇجاتتى قابىلداۋ تۋرالى ۇسىنىس قىرعىزستان قۇقىق قورعاۋ ورگاندارىنىڭ اتامباەۆ «تەتس-ءتى مودەرنيزاتسيالاۋ كەزىندە سىبايلاس جەمقورلىق قىلمىسى بولعان» دەگەن ايىبىنان كەيىن قابىلداندى.

ايتا كەتەيىك، 18 ناۋرىزدا بىشكەكتە وتكەن اقسى وقيعاسىندا قۇربان بولعانداردى ەسكە الۋ شاراسىندا قىرعىزستاننىڭ بۇرىنعى پرەزيدەنتى المازبەك اتامباەۆ جەەنبەكوۆتى بيلىككە اكەلگەنى ءۇشىن كەشىرىم سۇراعان بولاتىن. ول سوزىندە: «ءومىر بويى وتباسىلىق اۆتوريتارلىق رەجيممەن كۇرەسىپ ءجۇرىپ، ءىشىن كورمەي، سىرتىن عانا كورىپ، وسىنداي ادامدى بيلىككە الىپ كەلگەنىم ءۇشىن كەشىرىم سۇرايمىن»، – دەگەن. ال قازىرگى پرەزيدەنت سوورونباي جەەنبەكوۆ «مەن تۇرعاندا كلاندىق باسقارۋ جۇيەسى ەشقاشان بولمايدى» دەپ مالىمدەگەن.

"The Qazaq Times"