قىتاي ۇكىمەتى ساۋدا سوعىسىنا شىنداپ كىرىسكەنىن كورسەتتى. قۇراما شتاتتاردان كىرەتىن 60 ملرد دوللار قۇنىنا يە تاۋارلارعا كەدەن سالىعىن كوتەردى. بۇل ەرەجە 1 ماۋسىمنان باستاپ رەسمي اتقارىلماق. وتكەن جۇمادا اقش 200 ملرد دوللار كولەمىندەگى قىتاي تاۋارلارىنا 25 پايىزدىق تاريف بەلگىلەگەن ەدى.

الايدا، قىتايدىڭ بۇل قادامى كوپتى تاڭقالدىرمايدى. سەبەبى، وتكەن اپتادا ۋاشينگتوندا وتكەن اقش-قىتاي ساۋدا كەلىسسوزى ناتيجەسىز اياقتالدى. اقش تارابى تاريفتەردى جوعارلاتتى. ساۋدا كەلىسسوزىنە كەلە الماعان كەلەسى تاراپتا وسى قادامعا باراتىنى ونسىز دا بەلگىلى ەدى. بۇنداي جاعداي بىلتىر دا بولعان.

اقش پرەزيدەنتى دونالد ترامپ قىتاي ۇكىمەتىنە باجى سالىعىن كوتەرمەۋگە كەڭەس بەرگەن ەدى. الايدا، بەيجىڭ شەتەلدىك قىسىمعا «تىزە بۇكپەيتىنىن»، «ءوزى مۇددەمىزدى قورعاۋعا بار كۇشىمىزدى سالامىز» دەگەن سىڭاي تانىتتى. الداعى ۋاقىتتا، اقش-تان قىتايعا كىرگەن تاۋارلار، اسىرەسە ەت ونىمدەرى، سويا-بۇرشاق، شاي، كوفە سەكىلدى اۋىلشارۋاشىلىق ونىمدەرىنىڭ باعاسى كوتەرىلمەك.

الەمنىڭ الدىنعى ەكى ەكونوميكاسى اراسىنداعى 600 ملرد دوللار كولەمىندەگى ساۋدا تالاسى الەم ەكونوميكاسىنا دا ءوزىنىڭ كەرى اسەرىن كورسەتە باستادى. دۇيسەنبى كۇنى اقش، ەۋروپا جانە ازيا بيرجالارىندا شىعىن ۇلعايدى.

اقش پرەزيدەنتى دونالد ترامپتىڭ ساۋدا سوعىسىندا كوزدەپ وتىرعانى، قىتايدىڭ ساۋدا تەڭدىگىنە كوندىرۋ. قىتاي جىل سايىن اقش-قا 500 ملرد دوللار كولەمىندە تاۋار ساتىپ، اقش-تان تەك 130 ملرد دوللار كولەمىندە عانا تاۋار ساتىپ الىپ كەلگەن. بۇل ساۋدا تەڭسىزدىگىن جويۋ ءۇشىن ۋاشينگتون بەيجىڭدى ساۋدا ساياساتىنا رەفورما جاساۋعا شاقىرعان.

قازىرگى قىتاي بيلىگى ءۇشىن ترامپ ۇكىمەتى العا قويعان ساۋدا تالاپتارى «تەڭسىز شارت» رەتىندە باعالانىپ وتىر. بۇل ساۋدا تالاسىندا اقش-قا ۇتتىرىپ قويۋ، قىتايدىڭ قازىرگى باسشىسى شي جينپيڭ ءۇشىن «ولىمنەن دە اۋىر» دەپ قارايدى ساراپشىلار. سەبەبى، بۇل قايشىلىقتى رەتكە كەلتىرە الماسا، قىتاي باسشىسىنىڭ العا قويعان بارلىق باعدارلامالارى جۇزەگە اسپاي قالۋى مۇمكىن.

“The Qazaq Times”