ەركىن ساۋدا كەلىسىمى: اۋستراليا قىتايدىڭ ورنىن ۇندىستانمەن الماستىردى

اۋستراليا «قىتايدى ۇندىستانمەن الماستىردى». وتكەن اپتادا اۋستراليا ۇندىستانمەن ەركىن ساۋدا قاتىناسىن العا ىلگەرىلەتۋ بويىنشا كەلىسسوزدەر وتكىزىپ، جوعارى ناتيجەگە قول جەتكىزدى. ال، ەكى كۇن بۇرىن اۋستراليا بيلىگى كەلىسسوز تۋرالى مالىمەت بەرگەندە: «قىتايمەن بۇكىل ماسەلەنى شەشۋدىڭ جولى – ءۇندىستان» اتاپ كورسەتتى. وسىلايشا قىتايمەن ساۋدا سوعىسىنا ءتۇسىپ جاتقان اۋستراليا ءىرى ساۋدا سەرىكتەسى رەتىندە ءۇندىستاندى تاڭدادى.

اۋستراليانىڭ كەلىسسوز دەلەگاتسياسىن ەلدىڭ ساۋدا وكىلى ءارى بۇرىنعى پرەمەر -ءمينيسترى توني ەببوتت باستاپ باردى. ءۇندىستان پرەمەر-ءمينيسترى اۋستراليالىق «قوناقتارىن» جوعارى دەڭگەيدە قارسى الدى. كەلىسسوزدەن كەيىنگى مالىمدەمەسىندە توني ەببوتت ەكى ەل اراسىنداعى ەركىن ساۋدا كەلىسىمى «دەموكراتيالىق الەمنىڭ قىتايدان باس تارتاتىنىن كورسەتەدى» دەپ باعالاعان ەكەن.

اۋستراليانىڭ ساۋدا وكىلى قىتاي سىندى جاڭا دەرجاۆانىڭ بارعان سايىن كۇشەيىپ كەلە جاتقان كەزىندە ۇندىستانعا قولداۋ كورسەتۋدىڭ ماڭىزدى ەكەنىن اشىق ايتقان. ول جانە: ساۋدا كەلىسىمدەرى ەكونوميكاعا دا، ساياساتقا دا قاتىستى بولعاندىقتان، اۋستراليا مەن ءۇندىستان ەركىن ساۋدا كەلىسىمىن تەز ارادا دامىتۋى دەموكراتيالىق الەمنىڭ قىتايدان باس تارتىپ جاتقانىن ايعاقتايدى.  سونداي-اق، بۇل كەلىسىم ەكى ەلدىڭ ۇزاق ۋاقىت وركەندەۋىنە دە ۇلكەن ىقپال جاسايتىن بولادى»، – دەپتى توني ەببوتت سوزىندە.

اقش، اۋستراليا سىندى ەلدەردىڭ قىتايمەن ساۋدا سوعىسى كۇشەيىپ، قارىم-قاتىناسى ناشارلاي تۇسكەن باستاپقى كەزدە ءۇندىستان بۇل ەكى تاراپ ورتاسىندا بالانستى تەڭ ساقتاپ وتىرۋعا تىرىسقان ەدى. بىراق، وسىدان ءبىر جىل بۇرىن بولعان شەكارالىق قاقتىعىستان كەيىن ءۇندىستان مەن قىتاي قاتىناسى كۇرت ناشارلاپ، ناتيجەسىندە ءۇندىستان قىتايعا قارسى تاراپپەن ىنتىماقتى دامىتۋعا بەت بۇردى. ال، سونىڭ ناقتى كورىنىسى رەتىندە وتكەن اپتا ءۇندىستان مەن اۋستراليا ورتاسىندا كەڭ اۋقىمدى ەركىن ساۋدا كەلىسىمى جاسالدى.

“The Qazaq Times”