84 بالا دۋشانبەنىڭ اۋەجايىنا جەتكىزىلدى. فوتو: REUTERS.

تاجىك بيلىگى يراك جەرىنەن تاجىكستاننان بارعان جيھادشىلاردىڭ بالالارىن (جيىنى 84 بالانى) ەلىنە قايتارىپ كەلدى. «يسلام مەملەكەتى» تەررورلىق توبىنا قوسىلعان تاجىكستاندىق جيھادشىلاردىڭ بالالارى بۇعان دەيىن يراكتىڭ تۇرمەلەرىندە جانە قاشقىندار لاگەرلەرىندە جاساپ كەلگەن. بۇل تۋرالى Asia-Puls اقپاراتتىق سايتى حابار تاراتتى.

تاجىكستان بيلىگى وسى ماسەلە بويىنشا يراك ۇكىمەتىمەن ديالوگ ورناتقان. ناتيجەسىندە، باعدات 43 ايەل مەن 95 بالانى تاجىكستان ازاماتى دەپ انىقتاپ شىققان. قازىرگە 84 بالا ەلگە قايتارىلىپ، قالعان 11 بالانى قايتارۋ تۋرالى كەلىسسوزدەر جۇرىگىزىلىپ جاتقانىن، تاجىكستاننىڭ ءسىم تارابى مالىمدەگەن. بۇل بالالاردىڭ اتا-انالارى يراك جەرىندەگى، سۇرياداعى سوعىستارعا قاتىسقان، بىرقاتارى سوعىستاردا قازا تاپسا، بىرقاتارى تۇرمەلەردە.

يراك جەرىنەن قايتارىلعان بالالاردى دۋشانبەنىڭ اۋەجايىنان جاقىندارى كۇتىپ الدى. دەگەنمەن، ولاردى ەڭ الدىمەن ۇكىمەت ارنايى مەديتسينالىق جانە پسيحولوگيالىق كومەك كورسەتۋ ءۇشىن ارنايى ورتالىققا اپارماق.

تاجىكستان ورتا ازياداعى جيھادشىلار ەڭ كوپ شىققان ەلدىڭ ءبىرى. تاياۋ شىعىستاعى تەررورلىق ۇيىمدار جيھادقا شاقىرعان تۇستا، تاجىكستانداعى جۇمىسسىزدىق پەن الەۋمەتتىك جاعدايدىڭ ناشارلىعى دا ازاماتتاردىڭ تەررورلىق توپقا ىلەسۋىنە وزىندىك ىقپال ەتتى. مالىمەتتەرگە قاراعاندا 1900-دەن استام تاجىكستاندىق جيھادشىلار قاتارىنا قوسىلعان.

تاجىكستاننان شىققان جيھادشىلار تۇگەلگە جۋىق «يسلام مەملەكەتى» تەررورلىق توبىنا كىرگەن. ولاردىڭ 500-دەن استامى سوعىستاردا كوز جۇمعان.

جىل باسىندا قازاقستان بيلىگى دە ءسۇريا جەرىنە كەتكەن ازاماتتارىن قايتارى اكەلۋگە ورتا ازيادان العاشقى ەل بولىپ كىرىستى. 50-گە جۋىق ادامدى قايتارىپ اكەلدى. ولاردىڭ اراسىندا 30 بالا جانە 11 ايەل بار.

“The Qazaq Times”