فوتو: https://gdb.rferl.org

قالامقاس كەن ورنىنداعى اپاتقا «سي بۋ» قىتايلىق ينجەنەرلى بۇرعىلاۋ كومپانياسى كىنالى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى مالىمدەدى.

قر يدم يندۋستريالىق دامۋ جانە ونەركاسىپتىك قاۋىپسىزدىك كوميتەتى توراعاسىنىڭ ورىنباسارى نىعمەتجان ماقاجانوۆ: «بۇل فاكتى بوىنشا قىلمىستىق ءىس قوزعالعان بولاتىن. كوميسسيانىڭ تەكسەرۋ ناتيجەلەرى قۇقىققورعاۋ ورگاندارىنا جىبەرىلدى. اكىمشىلىك كودەكسكە سايكەس، ايىپتى كومپانياعا 100 مرپ كولەمىندە ايىپپۇل سالىنىپ، اكىمشىلىك ءوندىرىپ الۋ جازاسى تاعايىندالادى. سي بۋ كومپانياسى قىتايلارعا تيەسىلى»،– دەپ حابارلادى.

اپات سەبەپتەرىن تەكسەرۋ جۇمىستارى بارىسىندا ايىپتى كومپانيا ۇڭعىمانى بۇرعىلاۋ كەزىندە ونەركاسىپتىك قاۋىپسىزدىك تالاپتارىن بۇزعانى انىقتالعان. انىعىراق ايتقاندا، مۇناي جانە گاز ۇڭعىمالارىن بەكىتۋ بارىسىندا تسەمەنتتىڭ قاتايۋىن كۇتپەستەن ۇڭعىمانىڭ ساعاسى ۋاقىتىنان بۇرىن گەرمەتيزاتسيالانعان. سالدارىنان تەحنوگەندىك گازدىڭ جينالۋى سەبەپتى سۋ-گاز قوسپاسى اتقىلاعان.

13 ناۋرىزدا قالامقاس كەن ورنى ورتكە ورانىپ، ءتىلسىز جاۋ ءۇش كۇندە زورعا اۋىزدىقتالعان ەدى. اپات سەبەپتەرىن تەرگەپ تەكسەرۋ ناتيجەلەرى قۇقىق قورعاۋ ورگاندارىنا جىبەرىلگەن. وسىعان دەيىن ەنەرگەتيكا ءمينيسترى قانات بوزىمباەۆ «قالامقاس» كەنىشىندەگى ورتكە بايلانىستى: «مۇمكىن دۇرىس تسەمەنتتەلمەدى نەمەسە كاروتاج جۇمىستارى دۇرىس جۇرگىزىلمەدى. قازىر باستى ماسەلە ءورتتى توقتاتۋ. مەنىڭ ءبىرىنشى ورىنباسارىم (ماحامبەت دوسمۇحامبەتوۆ – رەد) قازىر سول جەردە جۇمىس ىستەۋدە. بۇگىن شتاب شەشۋشى ماسەلەلەردى سول جەردە قابىلدايتىن بولادى. ۆيدەودا گاز، گاز-سۋ قوسپاسى جانۋدا. زارداپ شەككەندەر جوق. ول جەردە بارلىعى تاجىريبەلى مۇنايشىلار عوي. ەلدى مەكەندەر الىستا ورنالاسقان. بۇدان تراگەديا جاساۋدىڭ قاجەتى جوق. انىقتايمىز، كىنالىلەر جاۋاپ بەرەدى، وتەماقى تولەنەدى»، – دەگەن بولاتىن.

"The Qazaq Times"