وڭتۇستىك كورەيا قىتايدا تۇتقىندالعان سولتۇستىك كورەيا ازاماتتارىنا پانا سۇراۋدا

وڭتۇستىك كورەياداعى ادام قۇقىعىن قورعاۋ ۇيىمى مالىمدەمە جاساپ، جاقىندا سولتۇستىك كورەيا شەكاراسىنان قاشىپ وتكەن 7 ادامنىڭ قىتايدا تۇتقىنعا الىنعانىن، قىتاي ۇكىمەتى بۇل تۇتقىنداردى سولتۇستىك كورەيا قايتارىپ بەرۋى مۇمكىن ەكەنىن ايتتى. اتالعان ۇيىم سونداي-اق،  سولتۇستىك كورەيا شەكاراسىن بۇزۋشىلار ەلىنە قايتارىلسا ولاردى اۋىر جازالاردىڭ كۇتىپ تۇرعانىن، سوندىقتان دا وڭتۇستىك كورەيا سىرتقى ىستەر مينيسترلىگىنەن بۇل ىسكە ارالاسۋىن تالاپ ەتكەن.

دۇيسەنبى كۇنى وڭتۇستىك كورەياداعى ادام قۇقىعىن قورعاۋ ۇيىمى «كورەي ادىلەت بىرلەستىگى» سولتۇستىك كورەيالىق جەتى ادامنىڭ ءساۋىردىڭ باس شەنىندە قىتايدىڭ شىنياڭ قالاسىنىڭ ماڭىندا تۇتقىندالعانىن، اراسىندا 9 جاستاعى قىز بالانىڭ دا بار ەكەنىن مالىمدەدى. اتالعان ۇيىم قىتايدا ۇستالعان سولتۇستىك كورەيا ازاماتتارىن ەلىنە قايتارماۋ جانە بوسقىن مارتەبەسىن بەرۋ تۋراسىندا سەۋل تارابىنىڭ ارالاسۋىن ءۇمىت ەتكەن.

وڭتۇستىك كورەيانىڭ «يونحاپ» اگەنتتىگىنىڭ حابارىنا قاراعاندا، وڭتۇستىك كورەيا ءسىم تارابى بۇل حاباردى العاننان كەيىن بەيجىڭ جانە شىنياڭ تارابىمەن بايلانىس ورناتقانىن مالىمدەگەن. ال، ەلدەگى ادام قۇقىعىن قورعاۋ ۇيىمى بولسا، حالىقارالىق بالالاردى قورعاۋ كونۆەنتسياسىنا سايكەس شەكارا بۇزۋشىلاردى كۇشتەپ ەلىنە قايتارۋعا جول بەرمەۋدى حالىقارالىق قاۋىمداستىقتان تالاپ ەتكەن. وڭتۇستىك كورەيالىق ۇيىمنىڭ تالابىنا سايكەس، بۇۇ بوسقىندار ءىسى جونىندەگى جوعارى كوميسسيا بۇل ماسەلەگە باسا نازار اۋداراتىنىن بىلدىرگەن.

“The Qazaq Times”