شىۇ وكىلدەرى اسكەري سالادا كۇش بىرىكتىرمەك

شانحاي ىنتىماقتاستىق ۇيىمىنا مۇشە ەلدەر الداعى ەكى جىلدا اسكەري سالادا كۇش بىرىكتىرمەك.

بىشكەكتە ۇيىمعا مۇشە ەلدەردىڭ قورعانىس مينيسترلەر كەڭەسىنىڭ وتىرىسىندا وسىنداي كەلىسىم جاسالدى. كەزدەسۋدە ايماقتىق جانە حالىقارالىق قاۋىپسىزدىك ماسەلەلەرى تالقىلانىپ، بىرلەسكەن ءىس-قيمىلدىڭ جوسپارى جاسالدى. ناتيجەسىندە، شىۇ وكىلدەرى اسكەري سالا اياسىندا ءتورت قۇجاتقا قول قويدى. قر قارۋلى كۇشتەرى باس شتابىنىڭ باسشىسى رايمبەردي دۋيشەنبيەۆ: «بىرلەسكەن اسكەري وقۋ-جاتتىعۋى جونىندەگى حاتتامانى ەرەكشە اتاپ ايتقىم كەلەدى. بۇل قۇجاتقا سايكەس ءۇندىستان مەن پاكىستان شانحاي ىنتىماقتاستىق ۇيىمى شەڭبەرىندە ۇيىمداستىرىلاتىن اسكەري جاتتىعۋلارعا قاتىسادى»، – دەپ مالىمدەدى.

وسى ۋاقىتقا دەيىن اتالعان ۇيىم ءۇشىن باستى نازاردا بولعان ءۇندىستان مەن پاكىستان ماسەلەسى ءالى كۇنگە دەيىن شەشىمىن تاپقان جوق. دەمەك، شانحاي ىنتىماقتاستىق ۇيىمىنىڭ كەڭەيتىلگەن قۇرامىنا ارتىلاتىن ءۇمىت كوپ، سىن-قاتەرلەر دە از ەمەس. باتىس باسىلىمدارى جارىسا جازىپ، كۇدىكپەن قاراعان كاشمير داۋىنا الداعى ەكى جىلدا وزگە مەلەكەتتەردىڭ ارالاسۋىمەن نۇكتە قويىلۋى ءتيىس. شەكارالىق ماسەلەلەرىن تولىعىمەن شەشىپ ۇلگەرمەگەن، كەزىندە بولىسكە سالا الماعان ايماق ءۇشىن ءبىر-بىرىنە قارسى قارۋ كەزەنگەن ەكى ەلدىڭ ەندىگى جەردە ءبىر وداق شەڭبەرىندەگى كەلىسىم ۇستەلىندە وزدەرىن قالاي ۇستايتىنى الەمنىڭ ءجىتى نازارىندا بولارى انىق.

"The Qazaq Times"