بىشكەكتە وتكەن شانحاي ىنتىماقتاستىق ۇيىمنىڭ سامميتىندە پارسى شىعاناعىنىڭ داعدارىسى دا تالقىعا سالىندى. يران پرەزيدەنتى حاسان رۋحاني قۇراما شتاتتى حالىقارالىق ەرەجەلەردى بۇزدى دەپ ايىپتادى جانە يراننىڭ ەكونوميكالىق مۇددەلەرىن قولداۋعا شاقىردى. پاكىستان پرەمەر-ءمينيسترى يماران حان پارسى شىعاناعىنداعى قاۋىپسىزدىك جاعدايىنان الاڭدايتىنىن ايتا كەلىپ، اقش-يران داعدارىسىن ديپلوماتيالىق جولمەن شەشۋدى ۇسىندى. 

شىۇ-نىڭ سامميتىندە رەسەي پرەزيدەنتى ۆلاديمير پۋتين دە يران-اقش داعدارىسى تۋرالى توقتالىپ، اقش-تىڭ يادرولىق كەلىسىمنەن بار تاراپتى شىعىپ كەتۋى ايماقتاعى تۇراقسىزدىقتى ارتتىرىپ قانا قويماي، يرانمەن بولعان يادرولىق كەلىسىمدى ءبىر جولاتا توقتاتۋى مۇمكىن ەكەنىن ەسكەرتكەن.

بۇل سامميتتە پرەزيدەنت حاسان رۋحاني قىتاي باسشىسى شي جينپيىڭمەن دە كەزدەسىپ، بەيجىڭنىڭ قولداۋىنا يە بولدى. قىتاي حالىقارالىق جاعدايلاردىڭ وزگەرگەنىنە قاراماستان يرانمەن قول قويعان كەلىسىمدى ساقتايتىنىن، ەكىجاقتى قارىم-قاتىناستى دامىتا بەرەتىنىن ايتتى.

يران پرەزيدەنتى بىشكەكتەگى سامميتتە پارسى شىعاناعىنداعى داعدارستى شەشۋ تۋرالى ءوز ۇسىنىستارىن دا جەتكىزگەن. شيەلەنىستى سانكتسيا نەمەسە سوعىسپەن ەمەس، كەلىسسوز ديالوگ ارقىلى شەشۋ كەرەك دەگەن پىكىرىن ايتقان. سونداي-اق، ول شانحاي ىنتىماقتاستىق ۇيىمىنىڭ مۇشەلەرىنەن يران ەكونوميكالىق مۇددەسىن قورعاۋدى سۇراعان.

يران مەن اقش اراسىنداعى قايشىلىقتىڭ ارتۋىنا بايلانىستى شانحاي ىنتىماقتاستىق ۇيىمى دا ۇلكەن سىنعا تاپ بولدى دەۋگە بولادى. يران شانحاي ىنتىماقتاستىق ۇيىمىنا مۇشە بولماعانىمەن، ۇيىمداعى ەڭ ىقپالدى قىتاي مەن رەسەيدىڭ قولداۋىنا يە بولعان. ءارى، اتالعان ۇيىمعا مۇشە بولۋعا ءوتىنىش بەرگەن ەلدەردىڭ ءبىرى. يراننىڭ اتالعان ۇيىمعا مۇشە بولۋى ۇيىمنىڭ سالماعىن ارتتىرىپ، ىقپالىن كەڭەيتەدى. الايدا، قۇرامىنداعى قازاقستان سەكىلدى بەيبىت جانە كوپۆەكتورلى ساياساتتى جاقتاۋشى ەلدەر ءۇشىن ءتيىمسىز بولادى.

“The Qazaq Times”