ترامپ قىتاي مەن رەسەيگە تالاپ قويدى

اقش پرەزيدەنتى دونالد ترامپ قىتاي مەن رەسەيدەن يادرولىق قارۋدان باس تارتۋدى تالاپ ەتتى.

Fox تەلەارناسىنا سۇحبات بەرگەن ترامپ امەريكانىڭ دەنۋكلەاريزاتسيانى تاڭدايتىندىعىن جانە قىتاي، رەسەي سىندى ەلدەر دە وسى جولعا بەت بۇرۋ كەرەكتىگىن ايتتى. سەبەبى، يادرولىق قارۋ سالدارىنان جەرگىلىكتى حالىق جاپا شەگىپ، مەملەكەتتەر اراسىندا شيەلەنىستى ارتتىرۋى مۇمكىن.

2018 جىلى 21 اقپاندا اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىندىعىن مالىمدەگەن. ونىڭ سوزىنشە، اق ءۇي اكىمشىلىگىنىڭ بۇنداي قادامعا بارۋىنا رەسەي تاراپىنىڭ كەلىسىمدى تولىقتاي ورىنداماۋى سەبەپ بولعان.

اقش پرەزيدەنتى دونالد ترامپ باسشىلىق قىزمەتىنە كىرىسكەلى بەرى العاش رەت كونگرەستە جاريالاعان جولداۋىندا «تەڭدەسسىز» اسكەري كۇش ەل قاۋىپسىزدىگىنىڭ كەپىلى بولادى دەپ، امەريكانىڭ يادرولىق قارۋىن جەتىلدىرۋگە جانە قالپىنا كەلتىرۋگە شاقىرعان بولاتىن. ءوز سوزىندە ول: «بۇكىل الەمدە ءبىز اقش-تىڭ مۇددەسىنە، ەكونوميكاسى مەن قۇندىلىقتارىنا قاتەر توندىرەتىن الاستاتىلعان رەجيمدەرگە، تەررورلىق توپتارعا جانە قىتاي مەن رەسەي سىندى باسەكەلەستەرگە كەزىگىپ وتىرمىز. بۇل قاۋىپ-قاتەرلەرگە قارسى تۇرعانىمىزدا السىزدىك – جانجالعا اپارار تىكە جول ەكەنىن، ال تەڭدەسسىز كۇش – قورعانىسىمىزدىڭ ەڭ سەنىمدى قۇرالى»،– دەگەن.

اقش-تىڭ رەسەي فەدەراتسياسىمەن زىمىران شارتىنان باسقا تاعى ءبىر كەلىسىمى بار. وعان 2010 جىلى باراك وباما مەن دميتري مەدۆەدەۆ قول قويعان ەدى. وسى قۇجاتقا سايكەس، قوس تاراپتىڭ دا يادرولىق قارۋ ارسەنالىن قىسقارتۋى كوزدەلگەن. شارت مەرزىمى 2021 جىلى اياقتالادى.

Washington رost مالىمەتى بويىنشا، قازىرگى ۋاقىتتا رەسەي 7 مىڭ دانا يادرولىق وق تۇمسىقپەن يادرولىق قارۋ بويىنشا الەمنىڭ ءبىرىنشى ورىنىندا تۇر. بۇل يادرولىق قارۋلاردىڭ 1910 داناسى پايدالانۋ تىزىمىنە ەنگىزىلگەن. ال، 2700 داناسى جويىلدى نەمەسە جويىلۋ ۇستىندە. 2390 دانا يادرولىق قارۋ تولىق جابدىقتاۋدان وتپەگەن. اقش-تا 6800 دانا يادرولىق قارۋ بار بولىپ، ونىڭ 1800 داناسى پايدالانۋعا دايىن. فرانتسيادا 300 دانا، قىتايدا 270 دانا (بۇنىڭ قانشا داناسى تولىق جابدىقتالعانى انىق ەمەس), ۇلىبريتانيادا 215 دانا، پاكىستاندا 140 دانا، ءۇندىستاندا 130 دانا، يزرايلدە 80 (كەي دەرەكتەردە 120 دانا بار بولۋى مۇمكىن دەلىنگەن), سولتۇستىك كورەيادا 60 دانا يادرولىق وق تۇمسىق بار.

"The Qazaq Times"