فوتو: https://pp.userapi.com

قازاقستان رەسپۋبليكاسى پرەزيدەنتتىگىنە ۇمىتكەرلەر مەملەكەتتىك ەمتيحاندا سەگىز قاتە جىبەرسە، ەكىلىك باعا الادى. بۇل تۋرالى لينگۆيستيكالىق كوميسسيا وتىرىسىندا ءمالىم بولدى.

ۇمىتكەرلەر اراسىندا وتەتىن ەمتيحان ءۇش كەزەڭنەن تۇرادى. ءبىرىنشى كەزەڭ جازباشا جۇمىس، ەكىنشى كەزەڭ ءۇزىندى وقۋ، ال ءۇشىنشى كەزەڭ كوپشىلىك الدىندا ەركىن سويلەۋگە ارنالعان. لينگۆيستيكالىق كوميسسيا توراعاسى مىرزاتاي جولداسبەكوۆ: «ءبىرىنشى كەزەڭدە ۇمىتكەر كونۆەرتتە جاسىرىلعان تاقىرىپتاردىڭ بىرىنە جازباشا جۇمىس تاپسىرادى. جازباشا جۇمىس 2 بەتتەن اسپاۋى كەرەك، ونى جازۋعا 1 ساعات ۋاقىت بەرىلەدى. ەگەر ۇمىتكەر 1 ساعاتتا جازىپ بىتىرە الماسا، كوميسسيا اقىلداسا كەلە، قوسىمشا جارتى ساعات بەرە الادى. كوميسسيا مۇشەلەرى جۇمىستى مۇقيات تەكسەرەدى، ءارىپ قاتەسىن، تىنىس بەلگىلەرىن قاداعالايدى. ماسەلەن، 8 ورفوگرافيالىق قاتە تابىلسا، ەكىلىك قويىلادى. ەكىنشى جانە ءۇشىنشى كەزەڭ تاپسىرمالارى دا بەكىتىلدى. ءۇشىنشى كەزەڭ تاقىرىپتارى قازاق حالقىنىڭ تاريحى، مادەنيەتى، جەتىستىكتەرى جونىندە بولماق. ۇمىتكەردىڭ ءسوز سويلەۋى كوميسسيانى قاناعاتتاندىرماسا، تاقىرىپتى تەرەڭىرەك اشۋ ءۇشىن قوسىمشا سۇراقتار قويۋىمىز مۇمكىن. اپەللياتسيا بۇعان دەيىنگى سايلاۋلاردا تاجىريبەمىزدە كەزدەسپەگەن. ەگەر ۇمىتكەرلەر تاراپىنان شاعىم تۇسكەن جاعدايدا، ورتالىق سايلاۋ كوميسسياسى شەشىم قابىلداپ، اپەللياتسيانى تالقىلايدى»، – دەپ مالىمدەدى.

كانديداتتاردى باعالايتىن لينگۆيستيكالىق كوميسسيا قۇرامىندا مىرزاتاي جولداسبەكوۆ، ءادىل احمەتوۆ، عاريفوللا ەسىم، سەرىك قاسقاباسوۆ، ەردەن قاجىبەك جانە گۇلتاس قۇرمانباي بار. مەملەكەتتىك ءتىل ەمتيحانىنان بولەك، كانديداتتار ءوزىنىڭ اقىل-ەسى دۇرىس ەكەندىگىن دالەلدەيتىن 107 پسيحولوگيالىق تەكسەرۋدەن ءوتۋى ءتيىس.

ايتا كەتەيىك، قازاقستاندا كەزەكتەن تىس پرەزيدەنت سايلاۋى 9 ماۋسىمدا وتەدى. ال كانديداتتاردى تىركەۋ مەرزىمى 28 ساۋىردە اياقتالادى. ازىرگە ەل اۋماعىندا تىركەلگەن التى پارتيانىڭ ەشقايسىسى پرەزيدەنتتىككە ۇمىتكەر ۇسىنعان جوق.

"The Qazaq Times"