فرانتسيانىڭ ستاتيستيكا جانە ەكونوميكالىق زەرتتەۋلەر بويىنشا ۇلتتىق ينستيتۋتى (INSEE) ەۋروپاداعى كەدەيلىك يندەكسىن جاريالادى.

مالىمەتتەرگە سايكەس، وداققا مۇشە ەلدەر تۇرعىندارىنىڭ الەۋمەتتىك جاعدايى 2008-2017 جىلدار ارالىعىندا تومەندەي تۇسكەن. بيىل ەۋروپالىق وداق قۇرامىنداعى مەملەكەتتەر اراسىندا كەدەيلىك كورسەتكىشى بويىنشا ۇلكەن ايىرماشىلىق بار. ماسەلەن، 9 ملن فرانتسۋزدىڭ تابىسى ەۋروپاداعى ورتاشا تابىستىڭ 60%-نان تومەن. بۇل ەۋرووداق بويىنشا 17,3%-عا تومەن كورسەتكىش.

ەۋرووداق قۇرامىنداعى 28 مەملەكەت اراسىندا كەدەيلىك دەڭگەيى وتە تومەن، ازاماتتارىنىڭ ءال-اۋقاتى ءبىرشاما جوعارى ەلدەردىڭ كوشىن چەحيا باستاپ تۇر. مەملەكەتتىڭ ورتاشا تابىسى ايىنا 620 ەۋرونى قۇراعان. بۇدان كەيىنگى ورىنداردا فينليانديا، سلوۆاكيا، گوللانديا ەلدەرى تۇر. كورسەتكىش بويىنشا سەگىزىنشى ورىن العان اۋستريادا ورتاشا تابىس 1 155 ەۆرو كولەمىندە.

2018 جىلى ەۋروپا ستاتيستيكالىق ورتالىعى ەۋروپانىڭ 112,9 ملن ازاماتى كەدەيلىكتىڭ از-اق الدىندا تۇر دەپ حابارلاعان بولاتىن. بۇل سان تۇتاس ەو-عا مۇشە ەلدەر حالقىنىڭ 22,5%-ى. ال 2017 جىلعى كورسەتكىشكە سايكەس، بولگاريا حالقىنىڭ 38,9%-ى، رۋمىنيانىڭ 35,7% حالقى، گرەكيانىڭ 34,8% ازاماتىنا كەدەيلىك قاۋپى تونگەن. اتالعان كورسەتكىش قازىرگى دە سول قالپىندا.

"The Qazaq Times"