قازاقستان مەن وزبەكستان پرەزيدەنتتەرى كەڭەيتىلگەن كەزدەسۋ وتكىزدى. فوتو: قر ءسىم رەسمي سايتى.

قازاقستان پرەزيدەنتى قاسىم-جومارت توقاەۆ وزبەكستانداعى ساپارىندا پرەزيدەنت شاۆكات ميرزيەەۆپەن جوعارى دەڭگەيدەگى كەڭەيتىلگەن كەزدەسۋ وتكىزىپ، بىرقاتار كەلىسىمدەر جاساستى. قر پرەزيدەنتىنىڭ وزبەك ەلىندەگى ساپارى وسى ەلدەگى قازاقستان جىلىنىڭ اشىلۋىنا تۇسپا-تۇس كەلگەن.

وزبەك ەلىندەگى مەملەكەتتىك ساپار. فوتو: قر ءسىم.

كەڭەيتىلگەن كەزدەسۋدەن كەيىن ەكى ەل باسشىسى كەلىسسوزدەر قورتىندىسى بويىنشا بىرلەسكەن ءباسپاسوز مالىمدەمەسىن وتكىزدى. ەكى ەل پرەزيدەنتى قازاقستان مەن وزبەكستان قارىم-قاتىناسىن بۇدان دا بيىك دەڭگەيگە كوتەرۋگە كۇش سالاتىنىن ايتتى جانە كورشىلەس ەلدەر اراسىنداعى تاۋار اينالىمىن 2020 جىلدىڭ سوڭىنا قاراي 5 ملرد اقش دوللارىنا دەيىن جەتكىزۋدى ماقسات ەتەتىندەرىن جەتكىزدى.

قازاقستاندىق دەلەگاتسيا قۇرامىنداعى لاۋازىمدىلار. فوتو: قر ءسىم.

پرەزيدەنت توقاەۆ پەن ميرزيەەۆ اراسىنداعى كەڭەيتىلگەن كەزدەسۋ وتىرىسىندا 9 ءىرى كەلىسىمگە قول قويىلعان. قر پرەزيدەنتىنىڭ ءباسپاسوز قىزمەتى مالىمدەمەسىنە قاراعاندا، كەزەكتى مەملەكەتتىك ساپاردا قول قويىلعان كەلىسىمدەر مىنالار:

  1. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ بىرلەسكەن مالىمدەمەسى.
  2. قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ەڭبەك قىزمەتى جانە ەڭبەكشى كوشىپ-قونۋشىلاردىڭ قۇقىقتارىن قورعاۋ تۋرالى كەلىسىم.
  3. قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى زاڭسىز كوشى-قونمەن كۇرەس بويىنشا ىنتىماقتاستىق تۋرالى كەلىسىم.
  4. تابىس پەن مۇلiككە قوسارلانعان سالىق سالۋدى بولدىرماۋ تۋرالى كەلىسىم اياسىندا قازاقستان رەسپۋبليكاسىنىڭ مەن وزبەكستان رەسپۋبليكاسىنىڭ ۋاكىلەتتى ورگاندارى بەرگەن رەزيدەنتتىكتى راستايتىن رەسمي قۇجاتتاردى تانۋ ءتارتىبى تۋرالى نوتالارمەن الماسۋ تۇرىندەگى كەلىسىم.
  5. قازاقستان رەسپۋبليكاسىنىڭ سىرتقى ىستەر مينيسترلىگى مەن وزبەكستان رەسپۋبليكاسىنىڭ سىرتقى ىستەر مينيسترلىگى اراسىنداعى 2019-2020 جىلدارعا ارنالعان ىنتىماقتاستىق باعدارلاماسى.
  6. قازاقستان رەسپۋبليكاسىنىڭ قورعانىس مينيسترلىگى مەن وزبەكستان رەسپۋبليكاسىنىڭ قورعانىس مينيسترلىگى اراسىنداعى اۋە شابۋىلىنا قارسى قورعانىس سالاسىنداعى ىنتىماقتاستىق تۋرالى كەلىسىم.
  7. قازاقستان رەسپۋبليكاسىنىڭ قورعانىس مينيسترلىگى مەن وزبەكستان رەسپۋبليكاسىنىڭ قورعانىس مينيسترلىگى اراسىنداعى اسكەري ۇشاقتاردى قابىلداۋ، اەرودروم-تەحنيكالىق قامتاماسىز ەتۋ جانە اسكەري اەرودرومداردا اسكەري اۋە كەمەلەرىن كۇزەتۋ تۋرالى كەلىسىم.
  8. قازاقستان رەسپۋبليكاسىنىڭ ۇلتتىق ەكونوميكا مينيسترلىگى مەن وزبەكستان رەسپۋبليكاسىنىڭ ينۆەستيتسيالار جانە سىرتقى ساۋدا مينيسترلىگى اراسىنداعى «ورتالىق ازيا» حالىقارالىق ساۋدا-ەكونوميكالىق ىنتىماقتاستىق ورتالىعىن قۇرۋ ماسەلەلەرى جونىندەگى ءوزارا تۇسىنىستىك تۋرالى مەموراندۋم.
  9. قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى مەن وزبەكستان رەسپۋبليكاسىنىڭ مينيسترلەر كابينەتى جانىنداعى ءدىن ىستەرى جونىندەگى كوميتەت اراسىنداعى ىنتىماقتاستىق تۋرالى مەموراندۋم.