Toqaev Özbekstan saparında 9 iri kelisimge qol qoyğan

Qazaqstan prezidenti Qasım-Jomart Toqaev Özbekstandağı saparında prezident Şavkat Mirzieevpen joğarı deñgeydegi keñeytilgen kezdesu ötkizip, birqatar kelisimder jasastı. QR prezidentiniñ özbek elindegi saparı osı eldegi Qazaqstan jılınıñ aşıluına twspa-tws kelgen.

Özbek elindegi memlekettik sapar. Foto: QR SİM.

Keñeytilgen kezdesuden keyin eki el basşısı kelissözder qortındısı boyınşa birlesken baspasöz mälimdemesin ötkizdi. Eki el prezidenti Qazaqstan men Özbekstan qarım-qatınasın bwdan da biik deñgeyge köteruge küş salatının ayttı jäne körşiles elder arasındağı tauar aynalımın 2020 jıldıñ soñına qaray 5 mlrd AQŞ dollarına deyin jetkizudi maqsat etetinderin jetkizdi.

Qazaqstandıq delegaciya qwramındağı lauazımdılar. Foto: QR SİM.

Prezident Toqaev pen Mirzieev arasındağı keñeytilgen kezdesu otırısında 9 iri kelisimge qol qoyılğan. QR prezidentiniñ Baspasöz qızmeti mälimdemesine qarağanda, kezekti memlekettik saparda qol qoyılğan kelisimder mınalar:

1. Qazaqstan Respublikasınıñ Prezidenti Qasım-Jomart Toqaev pen Özbekstan Respublikasınıñ Prezidenti Şavkat Mirzieevtiñ birlesken mälimdemesi.
2. Qazaqstan Respublikasınıñ Ükimeti men Özbekstan Respublikasınıñ Ükimeti arasındağı Eñbek qızmeti jäne eñbekşi köşip-qonuşılardıñ qwqıqtarın qorğau turalı kelisim.
3. Qazaqstan Respublikasınıñ Ükimeti men Özbekstan Respublikasınıñ Ükimeti arasındağı Zañsız köşi-qonmen küres boyınşa ıntımaqtastıq turalı kelisim.
4. Tabıs pen mülikke qosarlanğan salıq saludı boldırmau turalı kelisim ayasında Qazaqstan Respublikasınıñ men Özbekstan Respublikasınıñ uäkiletti organdarı bergen rezidenttikti rastaytın resmi qwjattardı tanu tärtibi turalı notalarmen almasu türindegi kelisim.
5. Qazaqstan Respublikasınıñ Sırtqı ister ministrligi men Özbekstan Respublikasınıñ Sırtqı ister ministrligi arasındağı 2019-2020 jıldarğa arnalğan ıntımaqtastıq bağdarlaması.
6. Qazaqstan Respublikasınıñ Qorğanıs ministrligi men Özbekstan Respublikasınıñ Qorğanıs ministrligi arasındağı Äue şabuılına qarsı qorğanıs salasındağı ıntımaqtastıq turalı kelisim.
7. Qazaqstan Respublikasınıñ Qorğanıs ministrligi men Özbekstan Respublikasınıñ Qorğanıs ministrligi arasındağı Äskeri wşaqtardı qabıldau, aerodrom-tehnikalıq qamtamasız etu jäne äskeri aerodromdarda äskeri äue kemelerin küzetu turalı kelisim.
8. Qazaqstan Respublikasınıñ Wlttıq ekonomika ministrligi men Özbekstan Respublikasınıñ Investiciyalar jäne sırtqı sauda ministrligi arasındağı «Ortalıq Aziya» halıqaralıq sauda-ekonomikalıq ıntımaqtastıq ortalığın qwru mäseleleri jönindegi özara tüsinistik turalı memorandum.
9. Qazaqstan Respublikasınıñ Aqparat jäne qoğamdıq damu ministrligi men Özbekstan Respublikasınıñ Ministrler Kabineti janındağı Din isteri jönindegi komitet arasındağı ıntımaqtastıq turalı memorandum.