بەلارۋس ۆيتسە-پرەمەرى رەسەي مۇناي قۇبىرىنا شەكتەۋ قويۋدى ۇسىندى.

ۆيتسە-پرەمەر يگور پەتريشەنكو پرەزيدەنت الەكساندر لۋكاشەنكوعا بەلارۋس اۋماعى ارقىلى وتەتىن رەسەيدىڭ «درۋجبا» مۇناي قۇبىرىنا شەكتەۋ قويۋدى ۇسىندى. پەتريشەنكونىڭ سوزىنشە، مۇناي قۇبىرى وسىدان جارتى جىل بۇرىن جوندەۋ جۇمىستارىنان ءوتۋى ءتيىس بولعان. بىراق ول ۋاقىتتا ارىپتەستىك جونىندەگى كەلىسىمگە سايكەس ول كەيىنگە قالدىرىلعان. قازىرگى تاڭدا ەكولوگيالىق ماسەلەلەرگە بايلانىستى قۇبىرعا شەكتەۋ قويۋ قاجەت نەمەسە مۇناي تاسىمالىن توقتاتۋ كەرەك.

ايتا كەتەتىن ءبىر جايت، اتالمىش ۇسىنىس رەسەي بەلارۋستەن باراتىن الما مەن المۇرت ونىمدەرىنە شەكتەۋ قوياتىنىن مالىمدەگەننەن كەيىن جاسالعان. بۇعان دەيىن رەسەي 12 ساۋىردەن باستاپ جوعارىدا اتالعان بەلارۋس ونىمدەرىن ءوز اۋماعىنا كىرگىزبەيتىندىگىن ايتقان. ماسكەۋ ءوزىنىڭ بۇل قادامىن بەلارۋستەن كەلەتىن ونىمدەردىڭ ارنايى قۇجاتى جوقتىعىمەن تۇسىندىرگەن.

بەلارۋس پرەزيدەنتى الەكساندر لۋكاشەنكو وسىدان ءبىراز ۋاقىت بۇرىن «رەسەيلىك ارىپتەستەرىمىز ادىلەتسىز جۇمىس ىستەۋدە. ولار ءوز نارىعىن ەشقانداي سەبەپسىز جابۋدا. سالدارىنان بەلارۋس كاسىپورىندارى ءوز تاۋارلارىن وتكىزە الماي جابىلۋعا ءماجبۇر» - دەپ مالىمدەگەن.

"The Qazaq Times"