اقش پەن يران قايشىلىعى جاڭا قاتەرلەردى ارلىپ كەلدى. فوتو: ۆەستي ەكونوميكا.

سوڭعى كۇندەرى اقش پەن يران ءبىر-ءبىرىنىڭ رەسمي اسكەري كۇشتەرىن تەررورلىق ۇيىم رەتىندە جاريالاپ، ۋاشينگتون مەن تەھران (تەگەران) ارا قاتىناسىنىڭ قايشىلىعىن ءورشىتىپ جىبەردى. ەڭ اۋەلى قۇراما شتاتتار پرەزيدەنتى ترامپ يراننىڭ يسلام رەۆوليۋتسياسى ساقشىلار كورپۋسىن تەررورلىق ۇيىم رەتىندە جاريا ەتتى. بۇعان جاۋاپ رەتىندە يران تارابى اقش-تىڭ باتىس ازياداعى بارلىق اسكەري كۇشتەرىن تەررورلىق توپ رەتىندە اتادى.

رەسمي اسكەري كۇشتەردىڭ تەررورلىق توپ رەتىندە اتالۋى تاريحتا كوپ بولا بەرمەيدى. پەنتاگون رەسمي مالىمدەمە جاساپ، يراننىڭ اقش اسكەري كۇشتەرىنە قارسى شەشىمى قوقان-لوقى قاتارىندا سانالمايتىنىن ايتتى. ارينە، يراننىڭ قارىمتا جاۋابىنا پەنتاگون تارابى ۇرەيلەنبەگەن كۇننىڭ وزىندە، الاڭداتاتىنى ءسوزسىز. سەبەبى، بۇۇ مۇشەسى رەتىندە بۇل ەكى ەل اتالعان «تەررورلىق ۇيىمدارعا» سوققى بەرۋگە مىندەتتى بولماق. يران مەن اقش اراسىنداعى بۇل قايشىلىق وڭىرلىك قاۋىپسىزدىككە دە جاڭا قاتەر الىپ كەلۋى مۇمكىن.

ورتا جانە تاياۋ-شىعىستا اقش-تىڭ بىرنەشە ون مىڭنان اسكەرى جانە 20-دان استام ماڭىزدى اسكەري بازالارى بار. يران رەسمي تۇردە تەررورلىق ۇيىم رەتىندە تانىعان بۇل اسكەري كۇشتەر يران قارۋلى كۇشتەرىنىڭ تەرروريزمگە قارسى كۇرەستى جەلەۋ ەتكەن شابۋىلدارىنا تاپ بولۋى مۇمكىن. ارينە، اقش تارابىنان يراننىڭ ساقشىلار كورپۋسى دا ءدال وسىنداي نىساناعا ىلىنەدى. بۇل ونسىزدا سوعىس ءورتى وشپەگەن ورتا شىعىستا قارۋلى قاقتىعىستاردىڭ جيلىگىن ارتتىرماق. 

يران مەن اقش ۇكىمەتتەرى تالاي مارتە ءبىر-ءبىرىن تەرروريزمنىڭ قولداۋشىسى رەتىندە ايىپتاعان. اسىرەسە، اۋعانستان، يراك، ءسۇريا جەرىندەگى داعدارىستاردا اقش يراندى استىرتىن ارەكەتتەر ارقىلى سەپاراتيستتەردى جەلىكتىردى دەپ ايىپتاسا، يران دا اقش-تى وسىعان ۇقساس جازعىرادى. بۇل وڭىرلىك تۇراقسىزدىقتىڭ باستى سەبەپتەرىنىڭ ءبىرى رەتىندە عالامدىق بەيبىتشىلىككە وراسان زور زيان كەلتىرىپ وتىر.  

“The Qazaq Times”