دايش-كە قارسى حالىقارالىق كواليتسيا وكىلدەرى باس قوسۋدا

يتاليانىڭ ورتالىق قالاسى ريمدە دايش-كە قارسى حالىقارالىق كواليتسياعا مۇشە ەلدەردىڭ مينيسترلەرى باس قوسىپ جاتىر. يتاليا مەن اقش تارابىنان ۇيىمداستىرىلعان جيىنعا الەمدەگى 80-نەن استام مەملەكەت پەن حالىقارالىق ۇيىمداردىڭ وكىلدەرى قاتىسۋدا.

اتالعان جينالىسقا قاتىسقان كوپتەگەن ەلدەردىڭ مينيسترلەرى دايش ۇيىمىن جويىلماعانىن، ءتىپتى ونى جويۋدىڭ مۇمكىن بولماعانىن ءبىر اۋىزدان اشىق مويىندادى. «دايش تەك تەرريتوريالىق جاقتان عانا جەڭىلدى، ونى جويۋ مۇمكىن بولمادى، ءالى كوپ نارسەنى ىستەۋگە تۋرا كەلەدى»، – دەدى يتاليانىڭ ءسىم باسشىسى لۋجي دي مايو. ودان كەيىن بايانداما جاساعان اقش مەملەكەتتىك حاتشىسى انتوني بلينكەن دە دي مايونىڭ ءسوزىن قۋاتتادى.

شارادا دايش-تىڭ پاندەميادان كەزىندەگى ءىس-قيمىلدارى تالقىعا سالىنىپ، الداعى ۋاقىتتاعى ىقتيمال قاتەرلەرىنە بولجام جاسالدى. وزدەرىن «يسلام مەملەكەتى» اتاعان تەررورلىق توپقا قارسى حالىقارالىق كواليتسيانىڭ باس حاتشىلىق مىندەتىن اتقارۋشى پاتريك ۋورمان جۋرناليستەرگە بەرگەن جاۋابىندا قازىرگى ۋاقىتتا دايش سودىرلارىنىڭ قاۋپى سولتۇستىك جانە باتىس افريكا ءۇشىن اسا قاۋىپتى بولا تۇسكەنىن اتاپ ءوتتى.

ۋورماننىڭ ايتۋىنشا، "يسلام مەملەكەتى" سودىرلارى ءالى دە ءوزىنىڭ قاۋىپتى دەڭگەيىن ساقتاپ تۇر. ولاردى تولىق جەڭۋ ءۇشىن يراك پەن ءسۇريا جەرىندە ءالى كوپ جۇمىستار اتقارىلۋى كەرەك. ولار وسى اتالعان ەلدەر دە جانە وزگە ەلدەردە دە بەلسەندى ارەكەت ەتىپ، شابۋىلدارىن جالعاستىرۋدا، تۇرعىندار اراسىندا ۇرەي تۋدىرۋدا.

ريمدە وتكەن وسى شارانىڭ سوڭىندا ساناۋلى ەلدەردىڭ ءسىم جەتەكشىلەرى اراسىندا ءسۇريا تاقىرىبىنداعى كەزلدەسۋ وتپەك.

ايتا كەتەيىك، 2014 جىلى وزدەرىن «يسلام مەملەكەتى» اتاعان تەررورلىق توپ يراكتىڭ ەكىنشى ۇلكەن قالاسى موسۋلدا «حاليفات» جاريالاعان بولاتىن. ولار يراك پەن سۇرياداعى ساياسي-الەۋمەتتىك، ەكونوميكالىق تۇراقسىزدىقتان پايدالانىپ وسى ەلدەردىڭ تەرريتوررياسىنان اۋقىمدى جەرلەردى باسىپ العان ەدى. كوپ وتپەي دايش-كە قارسى حالىقارالىق كواليتسيا قۇراما شتاتتاردىڭ باستاۋىمەن قۇرىلدى. 2019 جىلى دايش سودىرلارى باسىپ العان سوڭعى اۋدان قايتارىلدى.

“The Qazaq Times”