پوروشەنكو مەن پۋتين جارناماسى ۋكراينا حالقىن سايلاۋالدى سارساڭعا سالدى

وسى اپتادا ۋكراينا كوشەلەرىندە ۆلاديمير پۋتين مەن پەتر پوروشەنكونىڭ سۋرەتى بار سايلاۋالدى پلاكاتتار مەن كىتاپشالار پايدا بولدى. پلاكاتتاردا «21 ءساۋىر. شەشۋشى تاڭداۋ» دەپ جازىلعان. اتالعان جارنامالىق پلاكاتتان كەيىن ۋكراينا جۇرتىنىڭ پىكىرى ەكىگە جارىلىپ، سايلاۋالدى سارساڭعا ءتۇستى.

الەۋمەتتىك جەلىلەردە مۇنداي قادام سايلاۋالدى جاعدايدى باسەڭدەتۋ جانە مەملەكەتتەگى كەلەڭسىزدىكتەر دەپ باعالانعان. پرەزيدەنت شتابى بۇل ماسەلەنى «سىرتقى سىن-قاتەرلەر جاعدايىندا توتەپ بەرە الاتىن مىقتى پرەزيدەنت قاجەت» دەگەن ۇگىت-ناسيحات قاجەت دەپ ءتۇسىندىردى.

پوروشەنكو شتابى مەن جاقتاستارى «نە پوروشەنكو، نە پۋتين!» ۇرانىن ونىڭ كانديداتۋراسىن ۇسىنعاننان باستاپ پايدالانعان. سەبەبى، پەتر پوروشەنكو ۋكراينا پرەزيدەنتى لاۋازىمىن اتقارعان جىلدارى ساياسي-ديپلوماتيالىق جاعدايدا رەسەيدەن الشاقتاپ، ناتو مەن ەو-عا مۇشە بولۋعا كۇش سالعان.

كەشە ICTV تەلەارناسىنىڭ ەفيرىندە پەتر پوروشەنكو: «پۋتين ءوز سوزىندە ۋكراينا پرەزيدەنتتىگىنە كەز كەلگەن كانديدات قابىلدايمىز. تەك پەتر پوروشەنكودان باسقا دەگەن بولاتىن. اتالعان ءلوزۋنڭتىڭ اۆتورى مەن ەمەسپىن. ول ءسوز ءپۋتيننىڭ پىكىرىنەن الىنعان. سونداي-اق، مەن ۆلاديمير زەلەنسكيدى ءپۋتيننىڭ اگەنتى دەپ ايىپتامايمىن. بۇل ءدال ەمەس. ەگەر بىرەۋ وسىلاي تۇسىنسە-مەن كەشىرىم سۇرايمىن»، – دەپ مالىمدەدى.

كەي ساراپشىلاردىڭ پىكىرىنشە، پوروشەنكو ەكىنشى تۋردا جەڭىسكە جەتەدى. سەبەبى، ول ازاماتتاردىڭ ءومىر ءسۇرۋ دەڭگەيىن ارتتىرۋ جانە سىبايلاس جەمقورلىققا قارسى كۇرەس جولىندا ايتارلىقتاي جاقسى ناتيجەگە قول جەتكىزگەن. ۋكراينانى رەسەيدەن الشاقتاتىپ، باتىسقا بەت بۇرۋ جولىندا بىرنەشە زاڭدار قابىلدادى. ولاردىڭ قاتارىندا ەو مەن ناتو-عا مۇشە بولۋ، رەسەيمەن اراداعى «دوستىق» كەلىسىمىن بۇزۋ جانە گەرمانيامەن ەكونوميكالىق بايلانىس ورناتۋ بار. باتىس ەلدەرى ءۇشىن پوروشەنكو ۋكراينا پاتريوتى جانە حالىقتى رەسەي اگرەسسياسىنان قورعاۋشى رەتىندە بەلگىلى. وسىنداي ارتىقشىلىقتاردى ەسكەرگەن پوروشەنكونىڭ كومانداسى اكتەر زەلەنسكيدىڭ ساياساتتا تاجىريبەسى بولماعاندىقتان، پرەزيدەنت بولۋعا دايىن ەمەس دەپ ەسەپتەيدى.

«Greenberg Quinlan Rosner» ساۋالناما جۇرگىزۋ ورتالىعى ەكىنشى تۋرعا زەلەنسكي مەن پوروشەنكو وتكەن جاعدايدا، ارقايسىسى 40% -دان داۋىس جينايدى دەگەن بولجام جاساعان. مالىمەتتەر بويىنشا، سايلاۋشىلاردىڭ جارتىسى پرەزيدەنتتىك كرەسلودا جاڭا ادامنىڭ وتىرعانىن، ال قالعان جارتىسى تاجىريبەسى بار ساياساتكەردىڭ پرەزيدەنت بولعانىن قۇپتايدى.

ايتا كەتەيىك، ۋكراينادا پرەزيدەنت سايلاۋىنىڭ ءبىرىنشى تۋرى ناۋرىز ايىنىڭ 31-ءى كۇنى وتكەن. وندا سايلاۋ قورىتىندىسى بويىنشا، ۆلاديمير زەلەنسكي 30,22%، پەتر پوروشەنكو 15,93% داۋىس جيناپ، ەكىنشى تۋرعا وتكەن. سايلاۋدىڭ ەكىنشى كەزەڭى ءساۋىردىڭ 21-ءى وتەدى.

"The Qazaq Times"