ەردوعان ماسكەۋدە S-400 تۋرالى شەشىمىن وزگەرتپەيتىنىن قايتالادى

تۇركيا پرەزيدەنتى رەجەپ تايىپ ەردوعان كەزەكتى ماسكەۋ ساپارىندا رەسەيلىك زىمىران قورعانىس جۇيەسىن ساتىپ الۋ شەشىمىن وزگەرتپەيتىنىن تاعى ءبىر رەت قايتالادى. بۇل تۋرالى ول ماسەۋدە رەسەي پرەزيدەنتى پۋتينمەن بىرگە وتكىزگەن ءباسپاسوز جيىنىندا ايتتى.

ءباسپاسوز جيىنىندا جۋرناليستەردىڭ S-400 زىمىران قورعانىس جۇيەسىنە بايلانىستى سۇراعىنا جاۋاپ بەرگەن پرەزيدەنت ەردوعان: «ءبىزدىڭ ەگەمەندىگىمىز شارتسىز ءبىزدىڭ حالقىمىزعا تاۋەلدى. سوندىقتان وزگە ەلدىڭ ول تۋرالى ءسوز ايتۋىنا جول بەرە المايمىز. S-400 تۋرالى جوسپارىمىزدى جاسادىق، ونى جۇزەگە اسىردىق، ەندى ودان باس تارتۋدى تالاپ ەتەتىندەر ءبىزدى تانىمايتىندار. ءبىز بۇل تاقىرىپتا كەلىسىمگە قول قويدىق، دەمەك كەلىسىم وزگەرمەيدى»، –دەدى.

ونىڭ ايتۋىنشا رەسەيدىڭ S-400 زىمىران قورعانىس جۇيەسىن ساتىپ الۋ تۇركيا ءۇشىن اسا ماڭىزدى، ول جانە ءوڭىردىڭ قاۋىپسىزدىگى مەن تۇراقتىلىعىنا دا قاتىستى شەشىم.

تۇركيا ءوزىنىڭ اۋە قورعانىسىن ناتو وداقتاستارى قورعاي المايدى دەپ سانايدى. ال، اقش تارابى رەسەيدىڭ قورعانىس جۇيەسى ناتو پايدالاناتىن قورعانىس-اسكەري تەحنيكالارعا ۇيلەسپەيتىنىن العا تارتىپ، ءوزىنىڭ قورعانىس جۇيەسىن ساتىپ الۋدى ۇسىنىس ەتەدى.

 “The Qazaq Times”