فوتو: Mastertours

«اقش تۇركياعا سانكتسيا سالماۋى قاجەت» - دەپ مالىمدەدى تۇركيا سىرتقى ىستەر ءمينيسترى مەۆليۋت چاۆۋشوعلى.

«اقش تۇركياعا رەسەيدىڭ س-400 زىمىران جۇيەسىن ساتىپ العانى ءۇشىن سانكتسيا سالماۋى ءتيىس. سەبەبى اقش بۇل زاڭدى انكارا مەن ماسكەۋ كەلىسىمگە كەلگەننەن كەيىن قابىلدادى» - دەدى چاۆۋشوعلى ۋاشينگتوندا سويلەگەن سوزىندە.

بۇعان دەيىن تۇركيا س-400-ءدى ساتىپ الۋدان باس تارتپايتىندىعىن مالىمدەگەن. رەسمي انكارا تاراتقان اقپارات بويىنشا، س-400-ءدىڭ العاشقى لەگى بيىلعى جىلدىڭ سوڭىنا دەيىن كەلەدى.

ءوز كەزەگىندە اقش «تۇركيا رەسەيدەن س-400 زىمىران قۇرىلعىلارىن ساتىپ الۋ ارقىلى ناتو زاڭدارىنا قايشى ارەكەتتەرگە بارۋدا» - دەگەن ءۋاج ايتۋدا. اتاپ ايتقاندا، ۋاشينگتون «س-400-ءدىڭ ناتو ستاندارتتارىنا سايكەس كەلمەيتىندىگىن» العا تارتىپ، الداعى ۋاقىتتا ءوزىنىڭ سوڭعى ۇلگىدەگى ۇشاقتارىن تۇركياعا ساتپايتىندىعىن جانە انكاراعا سانكتسيا سالاتىندىعىن مالىمدەدى.

"The Qazaq Times"