تايۆان پرەزيدەنتى شەكارا بۇزعان قىتايلىق سوعىس ۇشاقتارىن ايىپتادى

كەشە تايۋان (تايۆان) پرەزيدەنتى تساي يىڭۆىن حانىم ارناۋلى مالىمدەمە جاساپ، تايۋان بۇعازىنان ۇشىپ وتكەن قىتاي سوعىس ۇشاقتارى تۋرالى پىكىر ءبىلدىردى. پرەزيدەنت تساي مالىمدەمەسىندە قىتاي اسكەري ۇشاقتارىنىڭ ارەكەتىنە نارازىلىق ءبىلدىردى جانە قاتاڭ ايىپتادى. ول بۇل ارەكەت بۇعازدىڭ ەكى جاعالاۋىنىڭ ءوز-ارا قۇرمەت پەن تۇسىنىستىگىنە اۋىر نۇقسان كەلتىردى دەپ باعالاعان.

تايۋان پرەزيدەنتى تساي يىڭ ۆىن. فوتو: VOA

تايۋاننىڭ قورعانىس تاراۋلارى جاساعان مالىمدەمەدە، قىتايلىق ەكى سوعىس ۇشاعى جەكسەنبى كۇنى ساعات 11:00 شاماسىندا تايۋان بۇعازىنىڭ ارالىق سىزىقتان ءوتىپ، بۇعازدىڭ وڭتۇستىك باتىسىندا شارلاۋ جۇرگىزگەنى ايتىلعان. بۇعازدىڭ تايۋان ارالىنا جاقىن ماڭدا ۇشقان قىتايدىڭ اسكەري ۇشاقتارىنا ەسكەرتۋ بەرۋ ءۇشىن تايۋان تارابى جاۋىنگەرلىك ۇشاقتارىن جىبەرگەن.

پرەزيدەنت تساي كەشەگى سوزىندە: «قىتاي ۇشاقتارىنىڭ شەكارا سىزىعىنان ۇشىپ ءوتۋى وڭىردەگى تۇراقتىلىق پەن قاۋىپسىزدىككە قاراتا قاساقانا ارانداتۋشىلىق قانا ەمەس، بۇل تايۋاننىڭ رەسمي مارتەبەسىنە بايلانىستى كەلىسىمدەردى بۇزۋ. بۇل ءىستىڭ جاۋاپكەرشىلىگىن قىتاي حالىق رەسپۋبليكاسى ءوز موينىنا الۋى كەرەك»، – دەگەن. ول سونداي-اق، قىتايدى ايماقتىڭ ءبىر مۇشەسى رەتىندە، بەيبىتشىلىك پەن تۇراقتىلىققا قاتەر توندىرەتىن ارەكەتتەردى تەز ارادا توقتاتۋعا، حالىقارالىق ەرەجەلەردى ساقتاۋعا شاقىرعان.

“The Qazaq Times”