تۇركياداعى سايلاۋدا وپپوزيتسيالىق پارتيا العا شىقتى

تۇركياداعى سايلاۋدىڭ الدىن الا جاسالعان قورىتىندىلارى بويىنشا ەردوعاننىڭ ادىلەت جانە دامۋ پارتياسى وپپوزيتسيادان كەيىن قالىپ كەلەدى. ەڭ نەگىزشى وپپوزيتسيالىق پارتيا بولىپ سانالاتىن رەسپۋبليكالىق ەلدىك پارتياسى اسىرەسە ورتالىق قالادا كوبىرەك داۋىسقا يە بولدى.

انكارا مەن ستامبۋل ەكى پارتياعا ءبولىنىپ قالعانداي. رەسپۋبليكالىق ەلدىك پارتياسىنىڭ ۇمىتكەرى مانسۋر ياناش انكارادا ءوز جەڭىسىن جاريالاسا، ستامبۋلدا ەردوعاننىڭ پارتياسى جەڭىسكە جەتتى. بىراق، ەلدەگى ءۇشىنشى ۇلكەن قالا ىزميردە وپپوزيتسيالىق پارتيا تاعى باسىم ءتۇستى.

تۇركياداعى كەزەكتى سايلاۋ ەلدىڭ ەكونوميكاسى كەرى كەتە باستاعان تۇستا وتكىزىلىپ جاتىر. سوندىقتان، تۇركيالىقتاردىڭ ساياسي بەلسەندىلىگى ءبىرشاما جوعارى. سايلاۋعا ەلدىڭ 57 ملن ازاماتى داۋىس بەرۋى دە وسىنى كورسەتەدى. بىرنەشە جەردەگى داۋىس بەرۋ ورتالىقتارىندا ازاماتتار اراسىنداعى ۇرىس-كەرىس، توبەلەستەن بىرنەشە ادام جارالانعانىن ايتپاعاندا، جالپى سايلاۋ ناۋقانى تىنىش كۇيدە ءوتتى دەۋگە بولادى.

ەردوعاننىڭ ادىلەت جانە دامۋ پارتياسى تۇركيا بيلىگىن 16 جىلدان بەرى ۇستاپ كەلەدى. سايلاۋ كەزىندە ەردوعان مالىمدەمە جاساپ، ەلدەگى بارلىق جاعدايدى ءاد پارتياسى شەشۋگە قابىلەتتى ەكەنىن ايتتى. ستامبۋلدا ءاد پارتياسى جەڭىسىن تويلاي بەرگەندە، انكارادا رەسپۋبليكالىق ەلدىك پارتياسى دا ءوز جەڭىسىن جاريا ەتتى. ەلدەگى ەكونوميكالىق جاعداي مەن 20 پايىزعا دەيىن جەتكەن ينفلياتسياعا بايلانىستى كەزەكتى سايلاۋدا تۇركيالىقتار پرەزيدەنت ەردوعان مەن ونىڭ ءاد پارتياسىن «جازاعا تارتۋى» مۇمكىن دەپ بولجانۋدا.

“The Qazaq Times”