ناتو مەن اقش رەسەيگە قارسى جاڭا سانكتسيا ەنگىزبەك

اقش-تىڭ مەملەكەتتىك حاتشىسى مايك پومپەو حابارلاعانداي، ۋاشينگتون ناتو-مەن بىرلەسىپ رەسەيگە جاڭا سانكتسيالار ەنگىزەدى. ونىڭ ايتۋىنشا، سانكتسيالار رەسەيدىڭ ۋكرايناداعى بەلسەندىلىگىنە قارسى باعىتتالادى.

«كەلەسى اپتادا بىرگە قابىلداناتىن قاتاڭ قاۋلىلاردىڭ  جاڭا سەرياسى جاريالانادى»، – دەدى پومپەو اقش وكىلدەرى پالاتاسىنىڭ حالىقارالىق ىستەر جونىندەگى كوميتەتىندە وتكەن كەزدەسۋدە. سونداي-اق، مەملەكەتتىك حاتشى زاڭ شىعارۋشىلارعا اق ءۇي ۇسىنعان 2020 جىلعا ارنالعان بيۋدجەتكە قاتىستى اقش-تىڭ سىرتقى ساياسي ستراتەگياسىن تانىستىردى.

اقش ناتو-داعى ارىپتەستەرمەن بىرگە ۋاشينگتوندا 3-4 ساۋىردە وتەتىن اليانس ەلدەرىنىڭ سىرتقى ساياسي ۆەدومستۆولارى باسشىلارىنىڭ ءسامميتى كەزىندە رەسەيدىڭ ۋكرايناداعى ءىس-ارەكەتتەرىنە قارسى سالىناتىن سانكتسيانى قابىلداماق. پومپەونىڭ ايتۋىنشا، سانكتسيالاردىڭ ماقساتى رەسەيدىڭ قىرىم مەن ازوۆ تەڭىزىندەگى «اگرەسسورلىق ساياساتىنا» جانە باسقا مەملەكەتتەردىڭ پرەزيدەنتتىك سايلاۋىنا ارالاسقانى ءۇشىن قولدانىلادى.

15 ناۋرىزدا اقش، كانادا جانە ەۋرووداق 2018 جىلدىڭ قاراشاسىندا بولعان كەرش بۇعازىنداعى وقيعادان كەيىن، سونداي-اق قىرىم اننەكسياسىنىڭ بەسىنشى جىلدىعىنا بايلانىستى رەسەيگە قارسى جاڭا شەكتەۋلەر ەنگىزگەن بولاتىن.

«ۋكرايناداعى رەسەيلىك اگرەسسياعا» جاۋاپ رەتىندە ۋاشينگتون سانكتسيالىق تىزىمگە التى ادامدى قوستى: ولاردىڭ كوپشىلىگى فسب شەكارا قىزمەتىنىڭ قىزمەتكەرلەرى. تاعى دا سەگىز كومپانيا بار. رەسەي 2016 جىلى اقش-تاعى سايلاۋعا ارالاستى. ەندى ۋكراينادا وتەتىن سايلاۋعا ارالاسۋى مۇمكىن. ءبىزدىڭ تاراپ ۋكراينادان كومەكتى ايامايمىز. جالپى ۋكراين حالقىنا قورعانىس قۇرالدارىن ۇسىنىپ، بارلاۋ كومەگىن كورسەتەمىز»، – دەپ مالىمدەدى اقش مەملەكەتتىك حاتشىسى. وسىعان دەيىن اقش-تىڭ ۇلتتىق بارلاۋ ديرەكتورى دەن كوۋتس ۋكرايناداعى سايلاۋعا رەسەيدىڭ نە ءۇشىن جانە قالاي ارالاسۋى مۇمكىن ەكەندىگىن ايتقان.

"The Qazaq Times"