"ەلاماناتى" بىرلەستىگى ءباسپاسوز جيىنىن وتكىزدى.

كەشە الماتىدا «ەلاماناتى» قوعامدىق بىرلەستىگى قىتايداعى قازاق ماسەلەسىن تاقىرىپ ەتكەن ءباسپاسوز جيىنىن وتكىزدى. جيىندا قىتايداعى قازاقتاردىڭ بۇگىنگى جاعدايى تۋرالى تالقىلانىپ، بىرقاتار ۇسىنىستار ورتاعا سالىندى.

جيىندى اتالعان بىرلەستىك توراعاسى رىسبەك توقتاسىن باستاپ جۇرگىزىپ، قىتايدا جاساپ جاتقان قازاقتاردىڭ بۇگىنگى باستى پروبلەمالارىن اتاپ كورسەتتى. ول سوزىندە قىتايداعى قازاقتاردىڭ سالت-داستۇرلەرىن ۇستانۋ مەن ءدىني نانىم-سەنىم قۇقىقتارى تاپتالىپ، قازاق تىلىندەگى مەكتەپتەردىڭ جابىلىپ جاتقانىن ايتا كەلىپ: «بۇگىندە قىتايداعى 2 ميلليونعا جۋىق قانداسىمىز ۇلت رەتىندە جويىلىپ كەتۋدىڭ الدىندا تۇر»، – دەدى. رىسبەك توقتاسىن مىرزا بىرلەستىك اتىنان پرەزيدەنت قاسىم-جومارت توقاەۆتان قىتايداعى قازاق تاعدىرىنا بەي-جاي قاراماي، ديپلوماتيالىق ارنالاردى پايدالانا وتىرىپ، ۇلتتىڭ تاعدىرىنا ساياتىن ماسەلەنى وڭدى شەشۋىن ءوتىنىش ەتتى.

جينالىسقا قاتىسقان قوعام قايراتكەرى رىسبەك سارسەنباي قىتايدىڭ قازاقستانداعى ەكونوميكالىق، ستراتەگيالىق مۇددەلەرىنىڭ بار ەكەنىن العا تارتا وتىرىپ، ايتالىق مۇناي-گازىنداعى قىتاي ۇلەسى مەن «ءبىر بەلدەۋ، ءبىر جول» باعدارلاماسىنداعى قازاقستاننىڭ ماڭىزدىلىعىن العا تارتا وترىپ، قىتاي بيلىگىنە ءوز تالاپتارىمىز قويۋعا بولاتىنىن اتاپ كورسەتتى. سونىمەن قاتار، ەكونوميكالىق جانە ساياسي قارىم-قاتىناستا تەڭ قۇقىلى بولۋدىڭ وسىنداي كەزەڭدەردە اسا ماڭىز ەكەنىن ايتتى. ال، رەجيسسەر ەركىن راقىشەۆ بىرنەشە جىلدان بەرى كوتەرىلىپ كەلە جاتقان «قىتاي قازاقتارىنىڭ ماسەلەسىن شەشۋ ءۇشىن ارنايى مەملەكەتتىك كوميسسيا قۇرۋ كەرەك» دەگەن ناقتى ۇسىنىسىن ورتاعا سالدى.

«ەلاماناتى» قوعامدىق بىرلەستىگى قىتايداعى قازاقتاردىڭ جانە ەلگە كەلگەن اعايىننىڭ ماسەلەلەرىمەن بەلسەندى ءارى تۇراقتى ارالاسىپ كەلەدى. بىلتىردان بەرى اتالعان بىرلەستىك اتالعان وزەكتى تاقىرىپتارمەن كوپتەگەن كەزدەسۋلەردى، ءباسپاسوز ءماسليحاتىن ۇيىمداستىرىپ كەلەدى.

“The Qazaq Times”