فرانتسيا ساپارىندا قىتاي باسشىسى اۋىر سىناقتارعا تاپ بولدى

فرانتسيا پرەزيدەنتى ەممانۋەل ماكرون قىتاي باسشىسى شي ءجينپيڭدى جەرورتا تەڭىزى جاعاسىنداعى شاعىن قالاداعى العاشقى قارسى الۋدان كەيىن، پاريجدەگى «جەڭىس قاپاسىندا» رەسمي ءارى سالتاناتتى تۇردە كۇتىپ الدى. الايدا، قىتاي باسشىسى فرانتسيا ساپارى كەزەكتى ەۋروپا ساپارىنداعى العاشقى ەكى ايالداماسىنان گورى ۇلكەن قيىندىقتارعا تاپ بولدى.

قحر توراعاسى وسىدان بۇرىن يتاليادا ەۋروپا ساپارىن باستاعان. يتاليا ۇكىمەتى قىتايدىڭ «ءبىر بەلدەۋ، ءبىر جول» جوباسىن قولداۋعا نيەت تانىتقان. ال، شاعىن عانا ەۋروپالىق ەل موناكو قىتايلىق Huawei كومپانياسىنىڭ ءوز ەلىندە 5G تەلەكوممۋنيكاتسيالىق جەلىسىن دامىتۋىنا رۇقسات بەرگەن.

ال، قىتاي ليدەرىنىڭ فرانتسيا ساپارى ەكى ەل باسشىسىنا دا بىردەي اۋىر سىناق بولدى. سەبەبى، شي جينپيڭ جونىنەن العاندا، ونىڭ بۇل ساپارىنىڭ ماقساتى ەۋروپادا قىتايدىڭ ەكونوميكالىق بايلانىستارىن كەڭەيتۋ عانا ەمەس، سونىمەن قاتار باسقا ءىرى جاھاندىق باسەكەلەستەرى الدىندا (اقش-تى اتاپ ايتۋعا بولادى) قىتايدىڭ ساياسي ىقپالىن كەڭەيتۋ ماقساتى دا بار. ال، ماكرون مەن ونىڭ وداقتاستارى قىتايمەن بولعان قارىم-قاتىناستا ەو-نىڭ ورتاق پىكىرىنىڭ بار ەكەنىن كورسەتە وتىرىپ، ماكرون ءوزىنىڭ دە ەۋروپاداعى ىقپالدى كوشباسشى رەتىندە ايگىلەۋ سىندى ماقساتتارى بار.

فرانتسيانىڭ باسىلىمدارى ەكى ەل باسشىسىنىڭ كەزدەسۋىن قورىتىندىلاعاندا، قىتايمەن بولعان بايلانىستا ەۋروپانىڭ بولشەكتەرى جوق ەكەنىن، ءالى دە ورتاق سەرىكتەس بولاتىنىن باسا ايتتى. ياعني، قىتاي ەۋروپا ەلدەرىمەن جەكەلەگەن بايلانىستى جۇزەگە اسىرۋ ءۇشىن ۇلكەن قيىندىقتاردىڭ بار ەكەنىن، ەو-عا مۇشە ەلدەر ورتاق ەۋروپالىق قۇندىلىقتار مەن ۇستانىمدارعا جۇگىنەتىنىن كورسەتكىسى كەلدى.

دۇيسەنبى كۇنگى كۇن ءتارتىپ بويىنشا، فرانتسيا مەن قىتاي باسشىلارى ەنەرگەتيكا، ازىق-تۇلىك جانە كولىك سالالارىنداعى بىرقاتار كەلىسىمدەرگە قول قويدى. وسىدان كەيىن ماكرون ەليسەي سارايىندا داستارحان جايعىزىپ، جوعارى لاۋازىمدىلار قاتىسقان قوناعاسى وتكىزدى. بۇل قوناعاسى تۋرالى حابارلاردا، ەكى ەل باسشىسى كليمات وزگەرىسى تۋرالى وي الماسىپ، ترامپ اكىمشىلىگىنىڭ كليمات وزگەرىسىنە بايلانىستى شەشىمدەرى تۋرالى سىن-پىكىرلەرىن ورتاعا سالعان.

ءبىر سوزبەن ايتقاندا، قىتاي باسشىسىنىڭ فرانتسيا ساپارى فرانتسيا-قىتاي عانا ەمەس، ەو-قىتاي قارىم-قاتىناسىنىڭ ءبىر بولەگىنە اينالىپ قالدى. بەيجىڭ لاۋازىمدىلارى ءوز ماقساتتارىنا قانشالىق جەتە الدى، بۇنى تولىق ءتۇسىندىرىپ بەرۋ قيىن. الايدا، يتاليا مەن موناكو ساپارىنان الدە قايدا قيىن ءتيدى. ءارى، ەو-نىڭ قىتايمەن بايلانىستاعى ۇستانىمدارىن جۇمسارتا المادى. ساپار قورىتىندىسى الداعى ۋاقىتتا الەم اقپاراتىنىڭ نازارىندا بولماق.

“The Qazaq Times”